काठमाडौं- त्रिभुवन विश्वविद्यालयका उपप्राध्यापक प्रेमबहादुर चलाउनेलाई सांघातिक हमला गर्ने सबै आरोपितहरु धरौटीमा छुटेका छन्।
दुई मुख्य अभियुक्तलाई काठमाडौं जिल्ला अदालतवाट सोमबार धरौटीमा छुटेका थिए। उनीहरुसँग अदालतले जनही ५५ हजार रुपैयाँ धरौटी माग गरेको थियो। अदालतले तोकेको धरौटी बुझाएर उनीहरु सोमबार नै छुटेका छन्।
अभियुक्त हरि आचार्य र योगेन्द्र रावललाई न्यायाधीश अम्बिकाप्रसाद निरौलाको एकल इजलासले धरौटीमा छोड्न आदेश दिएको र धरौटी रकम बुझाएर छुटेको जिल्ला अदालतका श्रेस्तेदार भीम निरौलाले बताए।
उपप्राध्यापक प्रेमबहादुर चलाउनेलाई २० असोजमा विश्वविद्यालय परिसरमै अचेत हुने गरी हमला गरिएको थियो। प्रहरीले फरार अभियुक्तको रूपमा मुद्दा अदालतमा बुझाएको थियो।
घटनामा संलग्न भन्दै प्रहरीले सात जनाविरुद्ध ज्यानमुद्दा चलाएको थियो। दुई हप्ता अस्पताल भर्ना भएका चलाउनेको दाहिने खुट्टा अपरेसनपछि समेत अझै पनि राम्रोसँग हिँड्डुल गर्न सक्दैनन्। उनलाई अर्धचेतन अवस्थामा आक्रमणकारीले छाडेर भागेका थिए। यसअघि कात्तिक अन्तिम साता पाँच आरोपितहरु धरौटीमा निरौलाकै इजलाशबाट रिहा भएका थिए।
त्रिभुवन विश्वविद्यालयका उपप्राध्यापक प्रेमबहादुर चलाउनेमाथि सांघातिक आक्रमण गर्ने दुई अभियुक्त धरौटीमा रिहा भएपछि न्यायााधीशविरुद्ध न्याय परिषदमा उजुरी पनि गरिएको थियो।
काठमाडौं जिल्ला अदालतका न्यायाधीश निरौलाको ईजलाशले उनीहरुलाई जनही ५० हजार धरौटीमा रिहा गरेको थियो। ज्यान मार्ने प्रयासको घटनाका अभियुक्तलाई सामान्य धरौटीमा रिहा गरेको भन्दै चलाउनेले न्यायपरिषदमा न्यायाधीविरुद्ध उजुरी दिएका थिए।
निरौलाको आदेशपछि ज्यान मार्ने उद्योगका अभियुक्त सिरहा असनपुर– ९ का २३ वर्षीय रुपेश साह, २४ वर्षीय रविकुमार लामा, २३ वर्षीय निरज रानामगर र झापा गौरादह–५ का २३ वर्षीय सयुस भनिने सयुज श्रेष्ठ धरौटी बुझाएर छुटेका थिए। सोमबार हरि आचार्य र योगेन्द्र रावल रिहा भएका हुन्।
जिल्ला अदालतका अनुसार घटनामा संलग्न भएको आरोपमा मुद्दा दायर भएका साह र लामा ५०–५० हजार , रानामगर ३५ हजार र श्रेष्ठ ३० हजार रुपैयाँ धरौटी बुझाएर छुटेका थिए। आचार्य र रावल ५५ हजार धरौटीमा रिहा भएका हुन्। आचार्य र रावल दुवै विश्वविद्यालयमा नेविसंघका नेता हुन्।
ज्यान मार्ने उद्देश्यले आक्रमण गरेको भन्दै प्रहरीले ज्यानमुद्दाको अभियोग लगाएको थियो। निरौलाले अभियुक्तलाई धरौटीमा छोड्न आदेश दिन थालेलगत्तै सरकारी वकिलको कार्यालयले तिहारअघि नै पाटन उच्च अदालतमा आदेश बदरका लागि निवेदन दिएको थियो।
चलाउनेलाई आक्रमण गर्न भाटा, रडलगायतका सामग्री प्रयोग गरिएको आरोपपत्रमा दावी गरिएको छ। सीसीटीभी फुटेजमा समेत प्रहरीले पक्राउ गरेका अभियुक्त घटनास्थलमा देखिएको प्रमाण प्रहरीले अदालतमा बुझाएको थियो।
अदालतको आदेशले न्याय महशुस भएन : चलाउने
अदालतले सबै अभियुक्तहरुलाई धरौटीमा छाडेपछि उपप्रध्यापक चलाउने न्याय नपाएको महशुस भएको बताए। ज्यान मार्ने नियत राखेर गरेको आक्रमणमा अदालतले हलुका रुपमा लिएर छोडेको तर फैसला नभएकाले अझै न्याय पाउने आशमा रहेको उनले बताए।
‘आक्रमणकारीलाई धरौटीमा छोड्ने जिल्ला अदालतको निर्णयले निराश छु,’ उनले भने। फैसला हुन बाँकी रहेकाले अहिले धेरै नबोल्ने उनको भनाइ थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
