काठमाडौं- खाद्य प्रविधि तथा गुण नियन्त्रण विभागले अनुगमनका क्रममा खानेपानीका २१ नमुना मापदण्डविपरीत भएको भन्दै कारबाही प्रक्रिया अघि बढाएको छ। आर्थिक वर्ष २०७७/०७८ को पहिलो चौमासिकमा कार्यप्रगति सार्वजनिक गर्दै विभागले खानेपानीका २१ नमुनासहित दानाका १६, तेल तथा घ्युका १४ र खाद्यान्नका १० नमुना मापदण्डविपरीत रहेकाले कारबाही प्रक्रिया अघि बढाएको जानकारी दिएको हो। यस्तै १५ पानी उद्योगको उत्पादनमा समेत विभागले रोक लगाएको छ।
कोभिड-१९ संक्रमणको जोखिमकाबीच विभागले चालू आर्थिक वर्षको पहिलो चार महिनामा बजार निरीक्षण गरी ११ सय ७९ नमुना संकलन गरेकोमा ७० नमुना मापदण्ड अनुसार नभएको पाइएका छन्। सबैभन्दा बढी पिउने पानीका २१ नमुना, दानाका १६, तेल तथा घ्युजन्य नमुना १४ र खाद्यान्नका १० नमुनालगायत अन्य खाद्य पदार्थका नमुना मापदण्डअनुसार नभएको पाइएको विभागका प्रवक्ता मोहनकृष्ण महर्जनले बताए। विभागले आफ्नो मातहतका कार्यालयहरुबाट खाद्य स्वच्छता सर्भिलेन्सका लागि ८ सय ७६ नमुना समेत संकलन गरेको उनले बताए।
विभागले खाद्य ऐननियम अनुसर न्यूनस्तर तथा दूषित उत्पादन र वित्रिवितरण गरेको कसुरमा विभिन्न जिल्ला प्रशासन कार्यालयहरुमा २६ वटा मुद्दा दायर गरेको छ। सबैभन्दा बढी पिउने पानी कम्पनीविरुद्ध मुद्दा ५ वटा, खाने तेलका ३, बेकरीका ३, दाना, चाउचाउ र मिठाइका २-२ वटा मुद्दा दायर भएका छन्। घ्यु, चामल, सस, काजु किसमिस लगायतका विभिन्न खाद्यपदार्थका मुद्दा समेत रहेको उनले बताए।
दायर मुद्दाहरुमध्ये ८ वटा न्यून गणस्तर, ७ दुषित, ७ वटा लेवललगायतका विवरण नमिलेका थिए। ४ वटा मुद्दाहरु खाद्य ऐन नियम निर्देशिका उल्लंघनसम्बन्धी रहेको प्रवक्ता महर्जनले बताए। विभागले पहिलो चौमासिकमा खाद्य/दाना उद्योग, होटल रेष्टुरेण्ट, राजमार्गका होटल लगातमा १ हजार ८ सय ७३ पटक निरीक्षण अनुगमन गरेको छ।
पिउने पानी, खानेल तेल होटल लगायतका विभिन्न विषयमा परेका १५३ उजुरीहरुको तत्काल सुनुवाई गरी कारवाही गरिएको पनि विभागले जनाएको छ। खाद्य ऐन, २०२३, खाद्य नियमापली २०२७ तथा निर्देशिका बमोजिम उत्पादन नगरेको पाइएका ३४ वटा उद्योग एवं खाद्य व्यवसायको उत्पादन रोक्का गरिएको छ। पिउने पानीका १५, खाद्यान्न तथा दलहनका ८, दूध तथा दुग्ध पदार्थका ६, तेल तथा घ्युजन्यका ३ र अन्य ३ खाद्य व्यवसाय रोक्का भएका छन्।
विभागले पहिलो चौमासिकमा विभिन्न १२ नाकामा रहेका कार्यालयबाट २५ हजार १५४ नमुना संकलन गरी जाँच गर्दा पापड, चामल, बदाम, मसला, मैदा लागयत २५ वटा नमुनाहरु प्रतिकूल रहेकाले आयात रोक्का गरिएको जनाएको छ। विभागले पहिलो चौमासिकमा खाद्य स्तर निर्धारण कार्यक्रम अन्तर्गत प्राविधिक र विज्ञहरुसँग छलफल गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
