काठमाडौं- करिब एक वर्षपछि नेपाली फुटबल टिमले अन्तर्राष्ट्रिय फुटबल खेल खेल्दैछ। बंगलादेशविरुद्ध शुक्रबार हुने मैत्रीपूर्ण फुटबलमा नेपालको तयारी कस्तो छ त?
विश्वभर कोरोना भाइरस (कोभिड-१९) का कारण खेलकुद ठप्प हुँदा फेरि फुटबल प्रतिस्पर्धामा फर्किन नेपाली फुटबललाई झण्डै एक वर्ष नै लाग्यो। एक साता नै अभ्यास र प्रतियोगिता नहुँदा समस्यामा पर्ने खेलाडीका लागि यति लामो समयअवधिले विभिन्न समस्या नल्याएको भने होइन। अन्य देशहरु फुटबल गतिविधिमा फर्किएको लामो समयपछि नेपाली फुटबलले कात्तिक दोस्रो साताबाट अभ्यास थाल्यो।
नेपालमा अहिले कोरोनाको अवस्था साम्य हुने संकेत देखिँदैन। कोरोना संक्रमण नेपाली राष्ट्रिय फुटबल टिमका खेलाडीहरुपनि देखिन थालेको छ। यस्तै प्रतिकुल समयका बाबजुद नेपाली राष्ट्रिय फुटबल टिमले बंगलादेशसँग दुई खेलेको मैत्रीपूर्ण खेल खेल्दैछ।
सन् २०१९ को नोभेम्बर १९ मा नेपालले भुटानमा विश्वकप फुटबल छनोटको दोस्रो चरणको खेलमा कुवेतसँग प्रतिस्पर्धा गरेको थियो। जुन खेलमा नेपाल कुवेतसँग १–० गोलले हार्न पुग्यो। त्यसपछि कोरोनाको महामारी फैलिएपछि नेपालले खेल्ने अन्तर्राष्ट्रिय प्रतियोगिताको मिति पनि सर्दै आएको थियो।
.jpg)
नेपालका लागि बंगलादेश बलियो टिम होइन। तर राम्रा र राष्ट्रिय टिमका भरपर्दा खेलाडी टिम बाहिर हुँदा बंगलादेश नेपालविरुद्ध हावी हुन सक्छ। राष्ट्रिय टिमका नियमित सदस्य रोहित चन्द, विशाल राई, अभिषेक रिजाल, देवेन्द्र तामाङ, विकेश कुथु र सुनिल बल अहिले टिममा छैनन्।
राष्ट्रिय टिममा यो पटक आठ जना नयाँ अनुहार बोकेर बंगलादेश पुगेका छन्, मुख्य प्रशिक्ष बालगोपाल महर्जन। मुख्य प्रशिक्षक योहान कालिनको अनुपस्थितिमा महर्जनले मुख्य प्रशिक्षकको भूमिका पाएका हुन्। त्यसो त बंगलादेशी टिम बारे महर्जनलाई निकै जानकारी छ। २०१८ मा भएको साफ च्याम्पियनसिप फुटबलमा नेपालले घरेलु टिम बंगलादेशलाई २–० गोलअन्तरले पराजित गर्दा मुख्य प्रशिक्षकमा बालगोपाल महर्जन नै थिए।
के छ नेपालको रणनीति?
बंगलादेश तुलनात्मक रुपमा नेपालमाथि हाबी हुँदै आएको छ। बंगलादेशसँग नेपालले १२ पटक हारेको छ भने दुई पटक बराबरी खेलेको छ। ६ खेलमा भने बंगलादेशलाई नेपालले पराजित गरेको छ।
पछिल्लो खेलहरुमा बंगलादेशसँग नेपालले जित्दै आएको छ। पछिल्लो पाँच खेललाई नियाल्ने हो भने नेपालले बंगलादेशसँग तीन खेलमा जित हात पार्दा एक खेलमा बराबरी र एक खेलमा हारेको छ।
पछिल्लो पाँच खेलमध्ये २०११ को साफ च्याम्पियनसिपमा नेपालले बंगलादेशलाई १–० गोलअन्तरले पराजित गरेको थियो। २०१२ मा भएको मैत्रीपूर्ण खेलमा नेपालले बंगलादेशसँग १–१ गोलको बराबरी खेलेको थियो भने २०१३ मा एएफसी एसियन कपमा भने नेपाल बंगलादेशसँग २–० ले हारेको थियो। त्यसपछि २०११ र २०१८ को साफ च्याम्पियनसिपमा नेपालले बंगलादेशलाई समान २–० गोलले पराजित गरेको थियो।
किरण चेम्जोङको कप्तानीमा रहेको नेपाली फुटबल टिमले बंगलादेशविरुद्ध शतप्रतिशत नतिजा निकाल्ने लक्ष्यमा छ। तर सिनियर खेलाडीको अभावमा नयाँ खेलाडीको आगमनमा टिमको तालमेल कस्तो होला भन्ने दुविधा देखिन्छ।
.jpg)
के छ त नेपालको योजना?
मुख्य प्रशिक्षक बालगोपाल महर्जन भन्छन्, ‘हामीले एक साता मात्रै अभ्यास गरेका छौं। कोभिडको कारण करिब ७–८ महिनादेखि खेलाडीले खेलेका छैनन्। त्यसैले हामीलाई चुनौती हुनेछ। बंगलादेशविरुद्ध पछिल्लो ५ वर्षमा हामी हाबी हुँदै आएका छौं। तर बंगलादेश नराम्रो टिम भने होइन। बंगलादेशविरुद्ध राम्रो नतिजा निकाल्ने छौँ।’
बंगलादेशविरुद्ध गोलकिपरमा कप्तान किरण चेम्जोङ हुँदा डिफेन्डरमा यो पटक अनन्त तामाङले नयाँ जोडी पाउने छन्। देवेन्द्र तामाङ टिममा नहुँदा नयाँ अनुहारमा विकास खवासको सम्भावना निकै छ। पछिल्लो समयमा बिक्रम लामाले डिफेन्डरको भूमिका खेल्दै आएका पनि छन्। अन्य डिफेन्डरमा रन्जित धिमाल, सुमन अर्याल, अजित भण्डारी र दिलेन लोक्तान छन्।
प्रशिक्षक बालगोपाल महर्जन निकै आक्रमक खेल खेल्न चाहन्छन्। विगतमा प्रशिक्षक महर्जनले ४–४–२ को पोजिसनमा खेलाउँदै आएका थिए। बंगलादेशविरुद्धको मैत्रीपूर्ण खेलमा पनि प्रशिक्षक महर्जन यही रणनीतिको साथ खेलाडीलाई मैदानमा उतार्ने छन्।
तर नेपाल टिम कोरोनाले थला नै परेको छ भन्दा फरक नपार्ला। बुधबार मात्रै गरेको कोरोना परीक्षणमा एक जना खेलाडीलाई कोरोना पुष्टि भएको छ। कोरोनाकै कारण प्लेइङ सेटका खेलाडी बंगलादेश जानबाट बन्चित भएका थिए। प्रशिक्षक महर्जन नेपाली टिम निकै कठिन अवस्थामा रहेको पनि स्वीकार गर्छन्। उनले भने, ‘प्लेइङ इलाभेनमै खेल्ने चार खेलाडीमा कोरोना संक्रमण भेटिएको थियो। त्यसैले पनि हामी अप्ठ्यारो परिस्थितिमा छौं। तर मेरा सबै खेलाडीमा मेरो पूर्ण विश्वास छ। उनीहरुले राम्रो खेल्ने छन्।’
मिडफिल्डरमा अन्जन विष्टसँगै सुजल श्रेष्ठ, तेज तामाङ र रवि पासवानको भूमिका मुख्य हुनेछ। फरवार्ड लाइनमा भने नवयुग श्रेष्ठसँगै भरत खवास छन्। यी दुबै खेलाडी पहिलो रोजाईबाट खेल्नेछन्।
बंगलादेशविरुद्ध पछिल्लो समयमा जित निकाल्दै आएको हुँदा मैत्रीपूर्ण खेलमा पनि नतिजा सकारात्मक नै हुने कप्तान किरण चेम्जोङको भनाइ छ। कप्तान किरणले भने, ‘थोरै समयमा अभ्यास गरे पनि हामी खेल्नको लागि निकै उत्साहित छौं। लामो समयपछि खेल्न लागिरहेका छौं पक्कै पनि राम्रो हुनेछ। हामी जित्नको लागि खेल्ने छौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
