काठमाडौं– नेपाली राष्ट्रिय ध्वजाबाहक नेपाल वायुसेवा निगम (नेपाल एयरलाइन्स)ले जहाजको चार्टर फेयर घटाउने तयारी गरेको छ। निगमले प्रतिस्पर्धी बजारमा बलियो उपस्थितिका लागि भन्दै आन्तरिक तथा अन्तर्राष्ट्रिय उडानमा प्रयोग गर्दै आएको चार्टर फेयर घटाउने तयारी गरेको हो।
जहाजको चार्टर रेट परिमार्जनका लागि अध्ययन गर्न गठन गरेको कार्यदलले प्रतिवेदन बुझाएसँगै यो प्रक्रिया अघि बढेको हो। निगमले मार्केटिङ निर्देशक जनक कालाखेतीको संयोजकत्वमा बनाएको कार्यदलले बुधबार महाप्रबन्ध डिम प्रकाश पौडेललाई अध्ययन प्रतिवदेन बुझाएको थियो। आन्तरिक र अन्तर्राष्ट्रिय उडानमा लिँदै ए–३३०, ए–३२० र ट्विनअटर जहाजको चार्टर रेट कम गर्न लागि अध्ययन गरेको थियो।
अध्ययन कार्यदलले वाइडबडी ए-३३० जहाजमा हाल लिँदै आएको १८ हजार १ सय डलर प्रतिघण्टालाई घटाएर १५ हजार ५ सय ३० डलर बनाउने तयारी भएको छ। यसैगरी ए-३२० जहाजको चार्टर फेयर ९ हजार डलर प्रतिघण्टाबाट घटाएर ७ हजार ७ सय १० डलर कायम गर्ने तयारी गरिएको छ।
साथै आन्तरिक उडानमा प्रयोग गरिँदै आएको ट्विनअटर जहाजको चार्टर रेट प्रतिघन्टा १८ सय डलरबाट घटाएर १३ सय डलर १० डलर कायम गर्ने तयारी छ।
नेपाल एयरलाइन्सले अहिले २ वटा वाइडबडी र २ वटा एयरबस अन्तर्राष्ट्रिय उडानमा प्रयोग गर्दै आएको छ भने ट्विनअटर जहाज आन्तरिक उडानमा प्रयोग गर्दै आएको छ।
अध्ययन कार्यदलले आन्तरिक तथा अन्तर्राष्ट्रिय उडानमा कुन गन्तव्यमा कति यात्रु कुन दरमा उडान गर्दा एयरलाइन्सको खर्च पुग्ने र कुन रेटमा भाडा तय गर्दा कति फाइदा हुन्छ भने विषय अध्ययनमा समेटेको छ।
‘कार्यदलले चार्टर रेट र उडानका ब्रेक–इभन कस्टका विषयमा अध्ययन गरेर रिपोर्ट बुझाएका छन्,’ महाप्रबन्धक डिम प्रकाश पौडेलले भने, ‘अब कार्यदलले दिएको रिपोर्टका आधारमा केही दिनमा निर्णय हुन्छ। यसको लक्ष्य भनेको आर्थिक संकटमा चुलिएको र घाटामा गएको निगमलाई फाइदा लैजानु नै हो।’
निगमले हवाई इन्धनको मूल्य पनि घटेको र कोरोनासँगै खुलेको अन्तर्राष्ट्रिय उडान र पछिको उडानमा प्रतिस्पर्धी बजारमा बलियो उपस्थिति हुने गरी चार्टर फेयर घटाउन लागिएको पौडेलेको तर्क छ।
कार्यदलले दिएको प्रतिवेदनको मर्मअनुसार अब निगम व्यवस्थापनले बोर्ड बैठकबाट पारित गराएर भाडा घटाउने र कार्यान्वयनामा ल्याउने तयारी गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
