धरान- कृषि बजार व्यवस्थापन समिति धरान– १३ ले उत्कृष्ट व्यवस्थापनको पुरस्कार पाएको छ। प्रदेशका विभिन्न जिल्लाका उत्पादनहरु सङ्कलन गरेर बिक्री वितरण गर्दै आएको सो बजारले कृषि तथा पशुपक्षी विकास मन्त्रालयले प्रत्येक वर्ष प्रदान गर्ने उत्कृष्ट व्यवस्थापन पुरस्कार पाएको हो। यसअघि पनि सो बजारले पटकपटक प्रथम पुरस्कार पाएको बजार व्यवस्थापक लक्ष्मण भट्टराईले जानकारी दिए। देशभरि व्यवस्थापन समिति बनाएर सञ्चालनमा आएका ११ वटा बजार रहेका छन्।
विदेश निर्यात, कृषि उत्पादन, बजार सेवा, मूल्य निर्धारण लगायतको मापदण्डको आधारमा विश्व खाद्य दिवसको अवसरमा नेपालभरिका कृषि थोक बजारहरुलाई पुरस्कृत गरिन्छ। यो वर्ष दोस्रोमा विर्तामोडस्थित कृषि उपज बजार र तेस्रो पोखराको कृषि उपज बजार घोषित भएका छन्। यस्तै उत्कृष्ट व्यवसायीमा प्रथम वीरेन्द्रनगरका लक्ष्मण खत्री, दोस्रोमा विर्तामोडका खगेन्द्र महतो र तेस्रोमा धरानकै अजयकुमार गुप्ता छानिएका छन्।
पुरस्कृत भए वापत पूर्वाधार विकासको कुनै योजना छनौट गर्ने अवसरसमेत पाउने बताइएको छ। गत वर्ष कार्यालय भवन निर्माणका लागि ३० लाख बजेट दिएको थियो। समितिले कार्यालय भवन बनाइसकेको छ।
यो वर्षका लागि आइतबार व्यवस्थापन समितिको बैठक बसेर आर्गानिक तरिकाले फलफुल पकाउने च्याम्वर निर्माण र आवास गृहको स्तरोन्नतिका लागि मन्त्रालयलाई प्रस्ताव पठाउने निर्णय भएको भट्टराईले जानकारी दिए। भट्टराईका अनुसार गत आर्थिक वर्षमा १ लाख ४५ हजार मेट्रिक टन बराबर कृषि वस्तुको कारोबार भएको थियो। कारोबारको २० प्रतिशत भारत निर्यात भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_Tr387xuecJ-1778130428.jpg)
-1764146706.png)
