काठमाडौं- जुगल गाउँपालिकाकी उपाध्यक्ष सृजना तामाङ जुगल हिमशृंखलाका हिमाल आरोहणमा जुटेकी छन्। राजधानीबाट नजिकैको मानिने जुगल हिमाल र हिमशृंखला आरोहणमा सोही हिमाल पर्ने गाउँपालिकाकै उपाध्यक्ष आरोहणमा जुटेकी हुन्।
उपाध्यक्ष तामाङको टोली असोज २७ गते जुगल हिमशृंखला आरोहणका लागि प्रस्थान गरेकी हुन्। जुगल हिम शृङ्खलाको ग्याल्जेनपिक आरोहणका लागि उनीहरु गएका थिए। ६ हजार १५१ मिटर उचाइमा रहेको राजधानीबाट नजिकको उत्कृष्ट गन्तव्यको सूचीमा रहेको मानिन्छ।
जुगल गाउपालिका–३ को उत्तरी भेगमा रहेका श्रृंखलाका ११ वटा चुचुरामा मात्र आरोहणका लागि अनुमतिप्राप्त छ। यो क्षेत्रमा पुग्न तीन हजार ५ सय मिटरको उचाइमा रहेको ने–पेमाशालको मनोरम दृश्य, उच्च भूभागमा रहेको फराकिलो मैदान, नजिकै ब्रह्मायणी नदी, जंगलमार्गमा तोङश्युक (हजार जना अट्ने) गुफा हेर्न पाइने जुगल गाउँपालिकाले जनाएको छ।
काठमाडौंबाट १४५ किलोमिटर दूरीमा रहेको उक्त हिमाल आरोहण खुला गरेको धेरै वर्ष भएको छैन। सरकारले २०७५ चैतमा पहिलो पटक जुगल हिमाल आरोहणका लागि खुला गरेको थियो।
गाउँपालिकाको पर्यटकीय क्षेत्रको प्रचारमा टेवा पुर्याउने उद्देश्यले गाउँपालिका उपाध्यक्ष तामाङ नेतृत्वको हिमाल आरोहणमा लागेको हाे। काठमाडौंबाट नजिको ‘पिक’ प्रचारप्रसार भएमा पर्यटन क्षेत्रमा सहयोग पुग्ने उनको धारणा छ।
ग्याल्जेन चुली जुगल हिमशृङ्खलाका ११ वटा मध्येको एक हो। योसँगै अब आरोहणका लागि ४ सय १५ हिमाल खुला भएका छन्। अझै एक हजार ३०० भन्दा बढी हिमाल आरोहणका लागि योग्य रहेको बताइन्छ।
जुगल हिमालको बेस क्याम्प बुम्बासेर्पुङयांखर्कसम्म पुग्ने गोरेटो बाटो रहेको छ। बेस क्याम्पसम्म पुग्ने सहज बाटो निर्माण गर्ने लक्ष्य गाउँपालिकाले लिएको छ।
बागमती प्रदेशका सामाजिक विकासमन्त्री युवराज दुलालसहितको टोलीले उक्त हिमाल आरोहणका लागि अनुमति खुला गर्न पहल गरेका थिए। यसपछि २०७५ चैत २७ गते भर्जिन हिमालको रुपमा चिनिएको जुगल हिमालमा पहिलोपटक मानव पाइला पुगेको थियो। चैत १५ गतेदेखि हिमालको चुचुरोतर्फ अघि बढेको सात सदस्यीय टोली २७ गते साँझ ५ः२० बजे शिखरमा पुगेको थियो। सगरमाथा आरोही एवं प्रथम समावेशी महिला हिमाल आरोहण दलकी सदस्य माया गुरुङको नेतृत्वमा जुगल हिमाल आरोहण शुरु भएको थियो।
गुरुङसहित सिन्धु पर्यटन परिषद्का महासचिव मिलन तामाङ, शर्मिला थापा, फोटोग्राफर प्रेम गुरुङ र अन्तर्राष्ट्रिय माउन्टेनगाइड तुलसी गुरुङ र अन्य सहयोगी जुगल हिमाल आरोहण गरेका थिए। प्रदेश ३ सरकार र जुगल गाउँपालिकाको आयोजनामा जुगल हिमालको औपचारिक आरोहण शुरु गरिएको थियो।
आरोहण खुला गरिएसँगै जुगल हिमशृङ्खला ग्याल्जेन चुली प्रथम आरोहण तथा अध्ययन गर्न र यो क्षेत्रको पर्यटन विकास गर्न स्थानीयहरुले आरोहणको शुरुवात गरेका थिए।
प्रदेश ३ सरकारको उद्योग, पर्यटन वन तथा वातावरण मन्त्रालय र जुगल गाउँपालिकाको कार्यालयले संयुक्त रुपमा आरोहण तथा अध्ययनका लागि गएको थियो।
जुगल हिमाल आरोहण खुला भएपछि सिन्धुपाल्चोकमा नयाँ पर्यटकीय रुट खुलेको पर्यटन व्यावसायीहरुले बताएका छन्। जुगल हिमालसहित यस क्षेत्रमा पर्ने पेमासाल पर्यटकहरुको लागि नयाँ गन्तव्य हो। वरिपरि हिमालले ढाकेको सुन्दर ठूलो चौर ने–पेमासाल हो। यो चौरमा बौद्ध गुरुहरु आएर ध्यान बसेको किम्वदन्ती छ।
ने–पेमासालबाट जुगल हिमालको बेस क्याम्पसम्म पुग्न एक दिन लाग्ने छ। बौद्ध धर्मग्रन्थमा संसारका १० उत्कृष्ट भूमिमध्ये ने–पेमासाललाई एक मानिन्छ।
.jpg)
.jpg)
.jpg)
.jpg)
.jpg)
.jpeg)
.jpg)
.jpg)
.jpg)
.jpg)
.jpg)
.jpg)
.jpg)
.jpg)
.jpg)
.jpg)
तस्बिर : सृजना तामाङ
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782563266.png)
-1764146706.png)
