फाइल फोटो
काठमाडौं- नेपाल कम्युनिस्ट पार्टी (नेकपा)मा एकपछि अर्को गर्दै नयाँ विवादहरु उत्पन्न हुँदै गएकाले आगामी केन्द्रीय कमिटी बैठक अन्योल बढेको छ। पार्टी विवादसँगै कोरोना संक्रमण पनि बढ्दै गएकाले नेकपाको जम्बो केन्द्रीय कमिटी बैठक बस्ने/नबस्ने भन्ने विषयले प्रवेश पाएको हो।
गत भदौ २६ गते सकिएको स्थायी कमिटी बैठकको निर्णयपछि अध्यक्ष केपी ओली र अर्का अध्यक्ष पुष्पकमल दाहाल ‘प्रचण्ड’ले जारी गरेको अन्तर पार्टी निर्देशनमा समेत कात्तिक १५ गतेदेखि १७ गतेसम्म तेस्रो केन्द्रीय कमिटी बैठक बस्ने उल्लेख थियो।
बैठकले महाधिवेशन सम्बन्धी कार्ययोजना पारित गर्न केन्द्रीय कमिटी बैठक बोलाएको थियो। अन्तर पार्टी निर्देशनले दिएको समय सीमाभित्र कुनै काम नभएकाले केन्द्रीय कमिटी बस्ने शंका उत्पन्न भएको हो। असोजभित्र पार्टी एकताका बाँकी सबै काम सम्पन्न गरी सबै ध्यान महाधिवेशनमा केन्द्रित गरिने भनिएको थियो। तर, पार्टी एकताका कामले एकता भएको २ वर्ष ५ महिनामा समेत पूर्णता पाएको छैन।
एकताका सबै काम पुरा नगरी पार्टीलाई महाधिवेशनमा कसरी केन्द्रित गर्न सकिन्छ भन्दै नेताहरुले प्रश्न उठाउन छन्।
यस्तै असोज महिनाभित्र सम्बन्धित जिल्ला कमिटीहरूले पार्टीको संगठित सदस्यता विवरण अद्यावधिक गरी प्रदेश कमिटी हुँदै केन्द्रीय संगठन विभागमा पठाउने भनिएको थियो। अहिलेसम्म सदस्यता नवीरणको कामले समेत कुनै गति लिएको छैन।
पार्टीलाई जिवन्त राख्न तल्लो तहका नेता कार्यकर्ताभन्दा शीर्ष नेतृत्व नै गम्भीर हुनुपर्ने केन्द्रीय सदस्य रामप्रसाद सापकोटा ‘दीपशिखा’ले बताए। ‘पार्टी अहिले पनि गम्भीर संकटमा फसेको छ। अब बचाउने कि सिद्धिन दिने त्यो दुई अध्ययक्षकै हातमा छ’, उनले भने, ‘पार्टी कमिटीले गरेका निर्णय नेतृत्वले मान्दै गए मात्रै पार्टी जिवन्त र चलायमान हुन्छ।
पार्टीले निर्णय गर्दै जाने, नेतृत्वले लत्याउँदै जाँदा पार्टी एकपछि अर्को चंगुलमा फस्दै गएका दीपशिखाले बताए।
नेकपाको विधान बमोजिम ६/६ महिनामा केन्द्रीय कमिटी बैठक बस्ने व्यवस्था छ। पार्टी एकता भएको २ वर्ष पाँच महिनामा पूर्ण बैठक एक पटक मात्रै भएको छ। पहिलो बैठकमा केन्द्रीय सदस्यलाई उपस्थित गराई अध्यक्ष ओली प्रचण्डले सपथ मात्रै खुवाएर बैठक सकिएको थियो। यसअघि ०७६ माघ १५ गतेदेखि १९ गतेसम्म पूर्ण एजेण्डा सहित दोस्रो केन्द्रीय कमिटी बैठक बसेको थियो। त्यही बैठकले पार्टी र सरकारका विषयमा गम्भीर छलफल समेत गरेको थियो। बैठकबाटै पार्टी महाधिवेशन ०७७ चैत २५ गतेदेखि ३० गतेसम्म काठमाडौंमा गर्ने निर्णय समेत गरेको थियो।
अब फेरी ९ महिनापछि बस्न थालेको केन्द्रीय कमिटी बैठक बस्ने वा नबस्ने कुनै टुंगो नभएको हो। पार्टीमा कर्णाली प्रदेशमा देखिएका विवादका विषयमा अध्यक्ष ओली प्रचण्डबीच खटपट बढ्दै गएको छ। कर्णालीको विवाद टुंग्याउने विषयमा दुई अध्यक्ष एक मत नभएपछि विवाद सतहमै छताछुल्ल भएको छ। कर्णाली प्रदेशको विवादका बाछिटाले दुई अध्यक्षलाई समेत हानेकाले अब बस्ने केन्द्रीय कमिटी बैठकलाई समेत असर पार्न सक्ने नेताहरुले बताएका छन्।
यस्तै गत भदौ २६ गतेको स्थायी कमिटी र सचिवालय बैठकले गरेको निर्णयबाट प्रधानमन्त्री ओलीले कार्यन्वयन नगरी एकलौटी ढंगले राजदूत नियूक्ति र मन्त्रिपरिषद पुनर्गठन गरेको भन्दै अर्का अध्यक्ष प्रचण्डसहित वरिष्ठ नेता माधवकुमार नेपाल असन्तुष्ट छन्। त्यस विषयमा समेत दुई अध्यक्ष सहित वरिष्ठ नेता नेपालबीच ठोस समझादरी नबनेकाले केन्द्रीय कमिटी बैठकलाई असर पर्ने देखिएको हो। तर पार्टीलाई जिवन्त छ भन्ने देखाउन पनि केन्द्रीय कमिटी बैठक तोकिएकै समयमा हुनुपर्ने सापकोटाले बताए।
यस्तै केन्द्रीय कमिटी ४ सय ४७ जनाको जम्बो कमिटीलाई कोरोना महामारीमा बैठक बसाल्न समेत गाह्रो हुन सक्ने पार्टी केन्द्रीय कार्यालयका सचिव ईश्वरी रिजालले बताए। ‘काठमाडौ उपत्यकामा दैनिक एक हजारभन्दा धेरै कोरोना संक्रमितको संख्या बढ्दै गएको छ। अहिले ४ सय ४७ जना केन्द्रीय सदस्य मात्रै होइन, पिए,पिएसो अरु सुरक्षाकर्मी पत्रकार गर्दा ठूलै जमघट हुन्छ’, रिजालले भने, 'सबै केन्द्रीय सदस्यलाई राखेर बैठक बसाल्न हल पाउन गाहो पनि छ। बैठकले कोरोना जोखिम बढाउने भएकाले सर्न सक्छ।’
तर केन्द्रीय कमिटी बैठकका विषयमा भने अहिलेसम्म कुनै जानकारी वा निर्देशन नआएको रिजालले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749277953.jpg)
-1764146706.png)
