काठमाडौं- कोरोना भाइरसको संक्रमणका कारण सार्वजनिक यातायात सकेसम्म कम चढ्नु उपयुक्त हुन्छ। सरकारले पनि भीडभाड नहुने गरी यात्रा गर्न सुझाव दिएको छ। त्यसैले यो वर्ष दसैं मनाउन सहरबाट गाउँ जानेहरु भएसम्म आफ्नै सवारीमा जानु उचित हुन्छ।
सवारी साधन चलाउँदा स–सानो कुरामा ध्यान नदिँदा दुर्घटना निम्तिन सक्छ। आफ्नो सवारी लिएर लामो यात्रामा निस्कनेहरुका लागि एकै पटक लामो यात्रामा निस्किँदा समस्या हुन सक्छ। त्यसैले सावधानीपूर्वक सवारी साधन चलाउनु जरुरी हुन्छ। मोटरसाइकल तथा गाडी चलाउँदा सानासाना कुराहरुमा ध्यान दिनुभयो भने दुर्घटबाट बच्न सकिन्छ।
यहाँ सवारी चलाउँदा सुरक्षित चालनका लागि ध्यान दिनुपर्ने कुरा बारे उल्लेख गरिएको छ।
ध्यान एकीकृत गर्नुस्ः मोटरसाइकल तथा गाडी चलाइरहेको समय तपाईंको आँखा जहाँ पर्छ, स्वभाविकरुपमा तपाईंको ध्यान त्यहीँ पुग्छ। त्यसैले ती साधन चलाउँदा ध्यान केन्द्रित गर्नुपर्छ। गाडी तथा मोटरसाइकल चलाउँद एकैछिन त हो वा १०/२० सेकेन्डमा कुरा सकिहाल्छु भनेर मोबाइलमा कुरा गर्ने, म्यासेज गर्ने लगायत काम काम गर्दा दुर्घटना निम्तिने सम्भावना धेरै हुन्छ।
विभिन्न संस्थाले गरेको अनुसन्धानबाट गाडी चलाउँदा चलाउदै मोबाइलमा कुरा गर्दा दुर्घटनाको संख्या ३ गुणा बढ्छ भने म्यासेज गर्नु झनै खतरनाक हुन सक्छ। म्यासेज गर्न थाल्दा दुर्घटना हुने सम्भावना २३ गुणाले बढ्ने अध्ययनहरुले देखाएका छन्।
रियर भ्यु ऐना मिलाउनुस्ः मोटरसाइकल तथा गाडी चलाउनुपूर्व आफ्नो बसाइ र पोजिसन अनुसारको दुवै ऐना मिलाउनुपर्छ। जसले सडकमा गाडी लिएर हिँड्दा तपाईंलाई बाटोको अवस्था जान्न सहयोग पुग्छ।
आफ्नो ड्राइभिङ सिट तल राख्नुस्ः विशेषगरी कारका धेरै जसो चालकहरु आफ्नो सिटमाथि उठाएर राख्न मन पराउँछन्। सिटमाथि उठाएर राख्दा गाडीको स्पिड धेरै भए पनि चालकलाई कम लाग्न सक्छ। तीव्र गतिका कारण दुर्घटना हुने सम्भावना बढ्छ। त्यसैले चालक सिट तल राख्नुभयो भने कम गति पनि चालकलाई छिटो लाग्छ, त्यसले सम्भावित दुर्घटनालाई न्यून गर्न मद्दत पुग्छ।
लाइट बाल्नुस्ः क्यानडामा गरिएको एक अध्ययनले दिनमा लाइट बालेर सवारीसाधन चलाउँदा ११ प्रतिशत दुर्घटना कम हुने देखाएको थियो। त्यसैले अहिले आएका सवारी साधनमा डेटाइम रनिङ लाइट (डिआरएल) सहित आउने गरेको छ। यो लाइटले सिधै इन्जिनसँग जोडिएको हुनाले इन्जिन स्टार्ट हुने बित्तिकै बत्ति बल्छ र इन्जिन अफ गरेपछि स्वतः निभ्छ।
आफ्नो हात चेक गर्नुस्ः गाडी, मोटरसाइकल चलाइरहेको समयमा हातको पोजिसन गलत भएको खण्डमा दुर्घटनाको खतरा बढी हुन्छ। त्यसैले सकभर हातको अवस्थामा ध्यान दिनु राम्रो हुन्छ। हातको पोजिसन ठीक हुँदा सुरक्षित चलाउन सकिन्छ।
सडक बत्तिमा ध्यान दिनुस्ः सडकमा सवारी साधन लिएर हिँड्दा मानिसहरु हतारमा देखिने गरेका छन्। त्यसरी हिँड्दा कुन लाइट बलिरहेको छ भन्ने यादसमेत नहुन सक्छ। जसले दुर्घटना बढ्ने सम्भावना अधिक हुन्छ। साथै सडक बत्ति भएको ठाउँमा याद नगरी सवारी चलाउँदा जरिवानासमेत तिर्नुपर्ने हुन्छ। तर हाम्रो देशमा काठमाडौं बाहेक अन्यत्र लाइट जडान भएको छैन।
द्रुत गतिमा मोटरसाइकल चलाउनेले सुरक्षित हुन थाहा पाउनुपर्ने तथ्य
युवाहरु मोटरसाइकलप्रति आकर्षित हुनु स्वभाविकै हो। प्राय युवाहरु तीव्र गतिमा मोटरसाइकल चलाउने गर्छन्। हाइवेमा झनै धेरैले तीव्र गतिमा मोरटसाइकल कुदाइरहेका हुन्छन्।
मोटरसाइकल यात्रालाई जति रोमाञ्चक मानिन्छ, दुर्घटनाको दृष्टिकोणले त्यति नै जोखिमपूर्ण पनि। पछिल्लो समय नेपालमा मोटरसाइकल प्रयोगकर्ताको संख्या दिनानुदिन बढ्दै गएको छ। कोभिडपछि मोटरसाइकल चलाउनेको संख्या समेत बढेको छ। दसैंमा घरजाँदा समेत मोटरसाइकलमै जानेको संख्या ठूलो छ। त्यसैले यहाँ सुरक्षित ड्राइभिङका केही टिप्स छन्:
एन्टिलक ब्रेकिङ सिस्टम
अहिले बजारमा आएका मोटरसाइकलमा एन्टिलक ब्रेकिङ सिस्टमको विशेषता उपलब्ध छ। कम्पनीले मोटरसाइकललाई थप सुरक्षित बनाउन यो विशेषता दिने गरेका हुन्। चालकले सकेसम्म एन्टिलक ब्रेक सिस्टमयुक्त मोटरसाइकल खरिद गर्दा यात्रा बढी सुरक्षित हुन्छ।
सर्टिफाइट हेलमेटको प्रयोग
प्राय कमसल हेलमेट प्रयोगका कारण दुर्घटनाको क्रममा चालक वा पछाडि बस्ने यात्रुको मृत्यु हुने सम्भावना धेरै हुन्छ। मोटरसाइकल चालकले राइडिङको समयमा अनिवार्य रुपमा डर्ट सर्टिफाइट हेलमेटको प्रयोग गर्नुपर्छ। यस्ता हलमेटमा राम्रो मटेरियल प्रयोग गरिएको हुन्छ। जसले दुर्घटनाको समयमा टाउकोमा असर पर्नबाट जोगाउँछ।
स्पिड
प्रायः नयाँ पुस्ताका चालकले प्रतिस्पर्धा गरेरै मोटरसाइकल हाँक्ने गर्छन्। अत्याधिक गतिका कारण मोटरसाइकल नियन्त्रण बाहिर गई दुर्घटना हुनसक्छ। त्यसैले मोटरसाइकल चलाउँदा सडकको अवस्था र नियम अनुरुप आफ्नो मोटरसाइकलको स्पिड कायम गर्नुपर्छ।
दुवै ब्रेकको प्रयोग गर्न सिक्ने
मोटसाइकलमा उपलब्ध दुवै ब्रेकको प्रयोग गर्न जान्नुपर्छ। यसले राइडिङलाई थप सुरक्षित बनाउने छ भने पर्फेक्ट राइडर बन्नका लागि दुबै ब्रेक लगाउन सिक्नुपर्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1732445217.webp)
