काठमाडौं- बाग्लुङको गलकोट नगरपालिकाले कक्षा ११ को परीक्षा गर्न विद्यालयहरूलाई निर्देशन दिएपछि विद्यार्थीहरूले विरोध गरेका छन्। परीक्षा संचालनका लागि नगरपालिकाले निर्देशन दिए पनि कोरोना संक्रमण बढेकाको भन्दै विद्यार्थीले परीक्षा स्थगित गर्न माग गर्दै विद्यार्थीहरूले विरोध जनाएका हुन्।
नगरले असोज २७ गते एक सूचना जारी गर्दै कक्षा ११ को परीक्षा संचालन गर्न विद्यालयहरूलाई निर्देशन दिएको थियो।
नेविसंघ नेतृ सगुन कँडेलले कोरोना संक्रमण बढिरहेको अवस्थामा विद्यालयमा तत्काल परीक्षा संचालन गर्दा झन् जोखिम हुने भएकाले आफूहरूले तत्काल परीक्षा संचालन नगर्न आग्रह गरेको बताइन्। 'दिनहुँ काेराेना संक्रमण बढिरहेको छ। यस्तो बेला परीक्षा सञ्चालन गर्न अनुमति दिनु जनस्वास्थ्यमाथि खेलबाड हुन्छ। त्याे पनि चाडपर्वकाे समयमा परीक्षा संचालन गर्नु उपयुक्त छैन,' उनले भनिन्।
गलकाेटका सबैजसो आइसोलेसन बेड भरिएका बेला परीक्षा संचालन नगर्न विद्यालय र नगरलाई पनि अनुरोध गरिएको उनको भनाइ छ। 'यस्तो बेला कसरी परीक्षा गर्न सकिन्छ र? त्यसैले हामीले परीक्षा नगराउन अनुरोध गरेका हौँ,' उनले भनिन्। नगरले सम्पूर्ण स्वास्थ्य मापदण्ड पुर्याएर परीक्षा गर्न संचालन गर्न भने विद्यालयले भने कुनै तयारी नगरेको विद्यार्थीको भनाइ छ।
कोरोना संक्रमणको जोखिम न्यूनीकरण गर्न सरकारले घोषणा गरेको लकडाउनका कारण बैसाखमा हुने परीक्षा रोकिएको थियो। पछि सरकारले स्थानीय तहको समन्वयमा विद्यालयले आफैँ मूल्यांकन गर्न पाउने व्यवस्था गरेको छ। कक्षा १० का विद्यार्थीको भने विद्यालयले नै मूल्यांकन गरी पठाएको विवरण राष्ट्रिय परीक्षा बोर्डले प्रमाणीकरण गरी परीक्षाफलसमेत सार्वजनिक भइसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
