काठमाडौं- स्पेनिस क्लब बार्सिलोनाका स्टार खेलाडी लियोनल मेस्सी गएको सिजन सकिने वित्तिकै क्लब छाड्ने योजनामा लागेका थिए। तर क्लबको बेच्ने अनिच्छा र महँगो रिलिज क्लजका कारण उनी निस्किन सहज भएन। मेस्सीले बार्सिलोना छाड्न चाहेर नछाडेको यो पहिलोपटक भने थिएन।
यसपटक मेस्सीलाई लाने योजनामा इंग्लिस क्लब म्यानचेस्टर सिटी देखिएको थियो। म्यानचेस्टर सिटीका प्रशिक्षक पेप गार्डिओलासँग मेस्सीले कुराकानी गरेर सबै पक्का गरिसकेका खबर समेत आएका थिए। तर आफू हुर्किएको क्लबसँग बेमेल हुँदाहुँदै मेस्सीले छाड्न सकेनन्।
यो पटक सिटी अगाडि देखिए पनि युरोपका ठूला क्लबहरुले एकपटक न एकपटक मेस्सी लैजाने प्रयास गरेकै छन्। यतिसम्म कि ला लिगामा प्रतिस्पर्धी क्लब रियल मड्रिडले समेत २०१३ मा मेस्सीलाई लैजाने प्रयास गरेको विषय बाहिरिएको छ।
रियल मड्रिड अध्यक्ष फ्लोरेन्टिनो फेरेजले २०१३ मा मेस्सी ल्याउन २५० मिलियन युरोको प्रस्ताव गरेको इटालियन पत्रकार ज्यानलुका डि मार्सियोले आफ्नो पुस्तक ‘ग्रान्ड होटल क्याल्सियोमर्काडो’ मा फेरेजले गरेको प्रस्तावका विषयहरु उल्लेख गरेका छन्।
रियल मड्रिडले युरोपियन फुटबलमा बनाएको दबदबामा मेस्सीको आगमन नौलो हुने विश्वास फेरेजले गरेका थिए। फेरेजले मेस्सीका लागि प्रस्ताव गरेको रकम मड्रिड रंगशाला सान्टियागो बर्नाबेउको पुनर्निर्माणका लागि छुट्याइएको पैसा थियो। तर मेस्सीले ‘आफू रियल मड्रिड नआउने भएकाले कुराकानीमा समय बर्बाद गर्नुको मतलब नरहेको’ बताएका थिए।
रियल मड्रिडले मेस्सीलाई लैजान प्रस्ताव गरेको विषय २०१८ मा फुटबल लिक्सले पनि लेखेको थियो। तर अहिले ज्यानलुका डि मार्सियोले आफ्नो पुस्तकमा अझ विस्तृत रुपमा विषय र घटनाक्रमहरु खुलाएका छन्।
अहिले मेस्सी बार्सिलोनामा २०२१ सम्मको सम्झौतामा छन्। यसपछि पनि मेस्सी लैजान विश्व प्रतिष्ठित क्लबहरु लागिपर्ने नै देखिन्छ। मेस्सी मैदानका खेलाडी मात्र होइनन्, उनको आगमन विश्व फुटबल बजारमा सबैभन्दा धेरै चल्न सक्ने व्यापार पनि हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768546075.png)
-1764146706.png)
-1768395492.png)
