काठमाडौं-प्रहरी प्रधान कार्यालयले दसैं, तिहार तथा छठलाई लक्षित गरेर ‘चाडबाड सुरक्षा योजना’ लागू गरेको छ। चाडबाडमा हुने आर्थिक अपराध, चोरी डकैती, लुटपाट, ठगी तथा मदिरा पिएर हुने झैझगडालगायतका अपराध रोक्न भन्दै चाडबाडलक्षित सुरक्षा योजना लागू गरिएको प्रहरी प्रधान कार्यालयले जनाएको छ।
यो वर्ष नेपालभरि ४८ हजार ८ सय ३० प्रहरी जनशक्ति परिचालन गरेर चाडबाडलाई सुरक्षित बनाइने प्रहरी प्रधान कार्यालयले जनाएको छ। कार्यालयका अनुसार काठमाडौं उपत्यकाका तीन जिल्लामा मात्रै ७ हजार ५ सय ५० प्रहरी परिचालन गरिएको छ। ट्राफिक प्रहरीसहितको टोलीले ५४ स्थानमा चेक प्वाइन्ट खडा गरेर चेकिङ सुरु गरिसकेको हेडक्वार्टरले जनाएको छ । त्यस्तै काठमाडौं उपत्यकाकै २९ स्थानमा यात्रु सहायता कक्ष स्थापना गरेर यात्रुहरुलाई हुने हरेक समस्या समाधान गर्न हेडक्वाटैरले निर्देशन दिएको छ।
चाडपर्वको अवसरमा शान्ति सुरक्षालाई सुदृढ बनाई काठमाडौं उपत्यकाको जनजीवनलाई सहज र सरल बनाउने उद्देश्यका साथ विशेष सुरक्षा योजना लागू गरिएको महानगरीय प्रहरी प्रहरी कार्यालय रानीपोखरीका डिआइजी विश्वराज पोखरेलले बताएका छन्।
जसका लागि स्थानमा सादा पोशाकमा प्रहरी टोली परिचालनदेखि बढी भीडभाड हुने स्थान बस टिकट काउन्टर, बैंक तथा वित्तीय संस्था, ठूला सपिङ मलमा विशेष निगरानी सुरु गरिएको डिआइजी पोखरेलले बताए।
जनताको जीउधनको सुरक्षाका लागि काठमाडौं उपत्यकाका विभिन्न स्थानमा ५४ वटा गस्ती टोली परिचालन गरिएको छ। टोलीले दसैंमा उपत्यकाबाहिर जाने यात्रुलाई सहज रुपमा यात्रा गर्ने वातावरण बनाउन ट्राफिक प्रहरीसँग आवश्यक सहकार्य गर्नेछ।
टिकट काउन्टर र काठमाडौंका मुख्य नाकामा पनि व्यापक सुरक्षा टोली परिचालन गरिएको छ। व्यक्तिको सम्पत्तिको सुरक्षा, बैंक, वित्तीय संस्थामा हुने लुटपाट नियन्त्रण गर्न आवश्यक व्यवस्था मिलाइएको जानकारी पोखरेलले दिए।
त्यसैगरी काठमाडौं उपत्यकाबाहिर प्रदेश १ मा ७ हजार ९ सय २२ प्रहरी परिचालन गरिएको छ। ८३ वटा ट्राफिकसहितको टोली बनाएर चेकिङ सुरु गरिएको छ। प्रदेश १ का जिल्लामा ३५ ठाउँ यात्रु सहायता कक्ष स्थापना गरिएको छ। प्रदेश २ मा ७ हजार ३ सय १० प्रहरी जनशक्ति परिचालन गरिएको छ। सादा पोशाकसहित परिचलान गरिएको यो जनशक्तिले चाडबाडमा हुने अपराधका घटना न्यूनीकरण गर्ने र अपराध भइहालेमा तुरुन्तै कारबाही गर्न ‘क्वीक रेस्पोन्स टोली’ समेत खटाइएको छ। प्रदेश २ ले ५४ वटा ट्राफिक प्रहरीसहितको चेकिङ टोली बनाएको छ भने ३३ स्थानमा यात्रु सहायता कक्ष स्थापना गरेको छ।
बागमती प्रदेश प्रहरी कार्यालयले ४ हजार १ सय ५३ जनशक्ति चाडबाड सुरक्षामा खटाएको छ। ६२ चेकिङ टोली र ३९ यात्रु सहायता कक्षसहित चाडबाडको सुरक्षा योजना लागु गरिएको बागमती प्रदेश प्रहरी कार्यालयले जनाएको छ।
त्यसैगरी गण्डकी प्रदेश प्रहरी कार्यालयले ५ हजार ३ सय ३ जनशक्ति परिचालन गरेको छ भने ७३ चेकिङ टोली र र ३६ यात्रु सहायता कक्ष खडा गरेको छ।
लुम्बिनी प्रदेश प्रहरी कार्यालय दाङले चाडबाड सुरक्षा भनेर ८७ वटा चेकिङ टोली बनाएको छ भने ४२ स्थानमा यात्रु सहायता कक्ष स्थापना गरेको छ। यो प्रदेशअन्तगर्तका जिल्लामा चाडबाड सुरक्षा भनेर ७ हजार ८ सय २५ प्रहरी परिचालन भएका छन्। त्यस्तै कणाली प्रदेशअन्तर्गत ७ हजार ३ सय १७ प्रहरी परिचालन गरिएको छ भने २८ वटा चेकिङ टोली र १० स्थानमा यात्रु सहायता कक्ष स्थापना गरिएको छ।
सुदूरपश्चिम प्रदेश प्रहरी कार्यालयअन्तर्गत ५ हजार ५० प्रहरी परिचालन गरिएको छ भने ४९ चेकिङ टोली र ४० स्थानमा यात्रु सहायता कक्ष स्थापना गरिएको छ। यसरी देशभरि जम्मा चाडबाड सुरक्षामा ४८ हजार ८ सय ३० प्रहरी परिचालन गरिएको छ। ४९० वटा चेकिङ टोली बनाइएको छ भने २ सय ६४ स्थानमा यात्रु सहायता कक्ष स्थापना गरिएको छ।
कुकुर स्नफिङदेखि ड्रोन गस्तीसम्म
योसँगै प्रहरी मुख्य–मुख्य नाका, सपिङ मललगायतका स्थानमा तालिमप्राप्त कुकुरसहितको टोली पनि खटाउने भएको छ। प्रहरी प्रधान कार्यालयका अनुसार बढी अपराध हुने स्थानहरुको पहिचान गरेर कुकुर स्नफिङको व्यवस्था मिलाइएको छ। विभिन्न लागआषैधदेखि बिस्फोटुक पदार्थसमेत ककुरले पहिचान गर्ने भएकाले अपराध नै हुन नदिन कुकुर स्नफिङले धेरै सहज हुने हेडक्वार्टरले जनाएको छ।
त्यसैगरी चाडबाडमा हुने अपराध, भेला, झैझगडालगायतको निगरानी गर्न ड्रोनमार्फत् हवाई गस्ती पनि गरिने भएको छ। ड्रोनको हवाई गस्तीले कैद गरेका भिडियो फोटाको आधारमा अपराध भइरहेको देखिएमा तुरुन्तै क्वीक रेस्पोन्स टिम खटाउने तयारी हेडक्वार्टरको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787673555.png)
-1787673999.jpeg)
-1786602170.png)
-1786513116.png)
