काठमाडौं- युरोपियन फुटबलमा नयाँ सिजनको खेलाडी किनबेच समय सोमबार अबेरदेखि सकियो। केही टिमले समयको उपयोग सही रुपमा गर्न सके भने केही क्लब खेलाडी किन्ने हल्ला र अनुमान भन्दा माथि देखिन सकेनन्। कोरोना माहामारीका कारण कमजोर बनेको फुटबल बजारका कारण पनि क्लबहरुले सोचेजस्तो लगानी गर्न सकेनन्।
युरोपियन लिगमा अहिले अन्तर्राष्ट्रिय खेलका लागि विश्रामको समय छ। अहिले केही खेलहरु सकिएको समयमा नै नपत्याउँदो गरी केही क्लबहरु उदाएका छन्। जसमा प्रिमियर लिगमा एस्टन भिला र इभर्टनले धेरैलाई चकित पारिरहेको छ।
गएको सिजन रेलिगेसनबाट मुस्किलले बचेको एस्टन भिला अहिले राम्रो देखिँदैछ। सुरुवातका तीन खेलमा एस्टन भिलाले तीनै खेल जितेको छ। म्यानचेस्टर युनाइटेड जाने हल्ला चलिरहँदा कप्तान ज्याक ग्रेलिसले एसटन भिलामै पाँच वर्षको सम्झौता थप गरे।
ब्रेनफोर्डबाट ओले वाट्किन्सलाई किन्न सक्नु पनि भिलाका लागि राम्रो देखियो। जसले लिभरपुललाई ७–२ ले हराउँदा उत्कृष्ट ह्याट्रिक हाने। आर्सनलबाट एस्टन भिला पुगेका गोलकिपर इमिलियानो मार्टिनेज पनि क्लबका लागि लयमा देखिएका छन्। चेल्सीबाट लोनमा ल्याइएका रस ब्राक्लीले पनि मिडफिल्डमा उत्कृष्ट काम गरिरहेका छन्।
/origin-imgresizer.eurosport.com/2020/10/03/2901195-59731908-2560-1440.jpg)
यस्तै नटिङहाम फरेस्टबाट १६ मिलियन पाउण्डमा किनिएका लेफ्ट ब्याक म्याटी क्यास र लियोनबाट ल्याइएका ब्रेट्रान्ड टाओरे पनि अट्याकमा राम्रो गरिरहेका छन्। एस्टन भिला जस्तै नयाँ सिजनको तयारीमा राम्रो देखिएको छ इभर्टन पनि।
२०१६ देखि नै क्लबले ठूलो रकममा काम गर्न थालेको भए पनि यो सिजन मात्र क्लब माथिल्लो स्तरमा देखिएको छ। त्यसमा प्रशिक्षक कार्लो एन्सेलोटीको योजना प्रभावकारी भइरहेको छ। गएको सिजन १२औँ स्थानमा लिग सकाएको इभर्टनले यो सिजनमा सुरुवातका चार खेल नै जितेको छ। त्यो पनि राम्रो लयका साथ। जसमा मिडफिल्डमा रियल मड्रिडबाट लगिएका ह्यामेस रोड्रिग्वेजको खेल तारिफयोग्य छ।
नापोलीबाट लगिएका ब्राजिलियन मिडफिल्डर मान एलान र वाटफोर्डका एब्डुलाए डुकोर पनि राम्रो देखिएका छन्। मिडफिल्डमा मात्र होइन एन्सेलोटीले लेफ्ट ब्याकमा मार्सेलीबाट नाइल्स कोनको र नरविच सिटीबाट बेन गोडफ्रेलाई ल्याएर सन्तुलित बनाउन सके। गोलकिपर जोर्डन पिकफोर्ड पहिलो रोजाइँमा हुँदाहुँदै उनले प्रतिस्पर्धा बढाउनकै लागि रोमामा रहेका स्वीडेनका गोलकिपर रोबिन ओल्सेनलाई समेत ल्याए।
एन्सेलोटीले खेलाडी किन्ने बेलादेखि बनाएको सोच अहिले प्रिमियर लिगका सुरुवातका खेलमा सफल देखिएको पनि छ। प्रिमियर लिगमा शीर्षमा रहनुका साथै यो सिजनका अरु सबै खेल समेत इभर्टनले जितिरहेको छ। जसमा काराबाओ कपमा क्वाटरफाइनलमा टिम छ। खेलाडी किनबेचको यो समयमा टोटनह्यामले पनि राम्रो काम गर्न सकेको आँकलन भइरहेका छन्।
:format(webp)/cdn.vox-cdn.com/uploads/chorus_image/image/67583013/1273533234.jpg.0.jpg)
टोटनह्याम सिजनको पहिलो खेलमा इभर्टनसँग १–० ले पराजित भयो। त्यसपछि साउथह्याम्पटनलाई ५–२ ले हराएको टोटनह्याम न्युक्यासलसँग १–१ को बराबरीमा रोकियो। पछिल्लो खेलमा म्यानचेस्टर युनाइटेडलाई ६–१ ले हराएपछि टोटनह्याम लयमा देखिएको चर्चा भइरहेको छ।
वुल्भ्सबाट राइट ब्याक माट डोहेर्टी र साउथह्याम्टनबाट मिडफिल्डर होजबर्गलाई ल्याएको टोटनह्यामले रियल मड्रिडबाट लोनमा आफ्ना पुराना खेलाडी ग्यारेथ बेललाई र मड्रिडबाट नै सर्जियो रेग्युलोनालाई ल्याएको छ। जसले यो समय टोटनह्यामले राम्रो उपयोग गर्न सकेको देखिन्छ। रेग्युलोन सेभियामा लोनमा छँदा गएको सिजन राम्रो प्रभाव देखाएका खेलाडी हुन्।
त्यसका साथै टोटनह्याम प्रशिक्षक जोस मोउरिन्होले स्टार खेलाडी ह्यारी केनको विकल्पसमेत हुन सक्ने गरी बेनफिकाका ब्राजिलियन स्ट्राइकर कार्लोस भिनिससलाई ल्याएका छन्। जसले गएको सिजन २४ गोल गर्न सकेका थिए।
आर्सनल यो सिजन खेल बजारमा ढिला गरी देखियो। तर अन्तिमको कामले भने आर्सनलले राम्रो गर्न सकेको बताइन्छ। एथ्लेटिको मड्रिडबाट ४५ मिलियन पाउण्ड तिरेर मिडफिल्डर थोमस पार्टेलाई अन्तिम समयमा लैजान सकेको आर्सनलले प्रशिक्षक मिकेल अर्टेटाको पहिलो रोजाइँको मिडफिल्डर पाएको हो।
यस्तै चेल्सीबाट फ्रि ट्रान्सफरको फाइदा उठाउँदै लगिएका विलियन पनि आर्सनलका लागि राम्रा भइरहेका छन्। लिलेका सेन्टर डिफेन्डर गाब्रियल मागाइल्स पनि आर्सनलका लागि राम्रो खेलाडी हुन्। जसलाई खर्च गरिएको २३ मिलियन पाउण्ड सार्थक देखिने अनुमान छन्। सबैभन्दा बढी आर्सनलले आफ्ना मुख्य खेलाडी एमेरिक अउबामेयाङलाई क्लबमा राखिरहन सक्नुृ पनि सफल काम हो। उनले थप तीन वर्षको सम्झौता गरेका छन्।
प्रिमियर लिगमा खेलाडी किनबेचको समय केही राम्रा काम गरेका यी क्लबहरुसँगै विजेता लिभरपुलले बायर्न म्युनिकबाट मिडफिल्डर थियागो अलकान्टारालाई लैजान सक्नु पनि सफल काममा जोडिएको छ। जहाँ चेल्सीले पनि केही सफल लाग्ने सम्झौताहरु गरिरहँदा मैदानमा त्यसको फल देख्न सकिएको छैन।
म्यानचेस्टर सिटी र म्यानचेस्टर युनाइटेड त अहिलेको समय राम्रो योजना बनाउन असफल नै देखिए। म्यानचेस्टर युनाइटेडले बोरुसिया डोर्टमुन्डबाट जोडन सान्चोलाई लैजान प्रयास गरिरहे पनि सफल हुन सकेन। बार्सिलोनाबाट उसमान डेम्बेलेलाई लोनमा लैजान गरेको प्रयासमा पनि युनाइटेड असफल रह्यो। यसैले अन्तिम समयमा पिएसजीबाट इडिसन काभानीलाई ल्यायो।
म्यानचेस्टर युनाइटेडमा अहिले सेन्टर डिफेन्डरको पनि आवश्यकता देखिएको छ। तर त्यसमा कोही खेलाडी आएका छैनन्। आयाक्सबाट मिडफिल्डर भ्यान डे बिकलाई किनेको भए पनि उनी मैदानमा प्रयोग भइसकेको देखिँदैन। यसैले प्रतिस्पर्धी क्लबहरुको तुलनामा युनाइटेड निकै पछि देखिएको छ।
म्यानचेस्टर सिटीले बेनफिकाका सेन्टर ब्याक रुबेन डायसलाई ल्याएर भिनसेन्ट कम्पनीको कमि पूरा गर्ने आश गरिरहेको छ। त्यसबाहेक सिटी खेलाडी किनबेचमा सम्झनयोग्य हुने गरी संलग्न भएन।
प्रिमियर लिगमा अहिलेको ट्रान्सफरको समयमा क्लबहरुले १.२१८ बिलियन पाउण्ड खर्च गरेका छन्। जुन युरोपका ठूला पाँच लिगमा सबैभन्दा बढी हो। जसमा अन्तिम दिन आर्सनलले एथ्लेटिको मड्रिडबाट ४५ मिलियन पाउण्ड तिरेर मिडफिल्डर थोमस पार्टेलाई ल्याउनु सबैभन्दा महँगो सम्झौता हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768395492.png)
-1768391713.png)
-1764146706.png)
