काठमाडौं- स्पेनिस क्लब बार्सिलोनामा फरवार्ड उसमान डेम्बेलेको भविष्य अन्यौलमा देखिएको छ। इंग्लिस क्लब म्यानचेस्टर युनाइटेडले उनलाई लोनमा लैजान चाहिरहँदा बार्सिलोना स्थायी रुपमा नै बेच्न चाहन्छ। तर अहिले खेलाडी किनबेचका लागि समय निकै कम छ।
ला लिगामा आइतबार राति सेभियासँग भएको खेलमा बार्सिलोनामा डेम्बेले प्रयोग भएनन्। फ्रान्सिस्को ट्रिनकाओ र पेड्री जस्ता युवा खेलाडी प्रयोग हुँदा तीब्रता चाहिने खेलमा डेम्बेले रुचाइएनन्। उनी बेन्चमा नै रहे। यसमा उनलाई क्लबले बेच्न चाहनुको कारण पनि प्रशिक्षकले अवसर नदिएको अनुमान भइरहेका छन्।
त्यसअघि ला लिगामा नै सेल्टा भिगोसँगको खेलमा पनि डेम्बेलेले मौका पाएका थिएनन्। पहिलो खेलमा भने भिलारियलविरुद्ध ७०औँ मिनेटमा अन्सु फातीको स्थानमा डेम्बेलेले खेलेका थिए।
लामो समय चोटका कारण समस्यामा परेका डेम्बेले यो सिजन लयमा फर्कने आशमा समर्थक देखिन्छन्। तर लुइस स्वारेजलाई एथ्लेटिको मड्रिड पठाएको बार्सिलोना नम्बर ९ स्ट्राइकर किन्ने योजनामा डेम्बेले बेच्न चाहिरहेको छ। बार्सिलोना फ्रेन्च क्लब लियोनबाट मेम्फिस डिपे किन्ने तयारीमा लागिरहेको छ।
बार्सिलोना प्रशिक्षक रोनाल्ड कोम्यान भने डेम्बेले बार्सिलोनाकै खेलाडी रहेको र उनलाई आफूले योजनाभन्दा बाहिर नपारेको बताइरहेका छन्। ‘ यो विश्वमा यकिन गर्न सकिने विषय त के छ र? अन्तिम समयसम्म केही हुन सक्छ नै। अहिलेसम्म डेम्बेले बार्सिलोनाका खेलाडी हुन्, भविष्यको बारेमा मैले उसँग राम्ररी कुराकानी गरेको छैन।’
२०१७ को अगस्टमा बोरुसिया डोर्टमुन्डबाट बार्सिलोना आएदेखि नै डेम्बेलेले आफ्नो शैली देखाउन असमर्थ भइरहेका छन्। बार्सिलोनाले १०५ मिलियन युरो तिरेर डेम्बेलेमार्फत स्टार खेलाडी नेमारको कमि पूरा हुन सक्ने सोच बनाएको थियो। तर लगातार चोटमा परिरहँदा उनले मैदानमा राम्रो समय बिताउनै पाएनन्।
बार्सिलोनामा डेम्बेलेले अहिलेसम्म ७५ खेल खेलेका छन्। जसमा उनले १९ गोल र १६ असिस्ट गरेका छन्। २३ वर्षका डेम्बेले आउँदो सिजन कस्तो अवस्थामा रहलान् ट्रान्सफरको अन्तिम समयमा हुने निर्णयले प्रभाव पर्नेछ। उनी म्यानचेस्टर जाने सोचमा नभए पनि क्लबले लगातार पठाउन गरिरहेको संघर्षको निर्णय सोमबार अबेरसम्म आउनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
