काठमाडौं– प्रतिपक्ष दल नेपाल कांग्रेसले प्रदेश ५ का मुख्यमन्त्री शंकर पोखरेललाई प्रदेशको नाम र राजधानीका विषयमा नेकपाका अध्यक्षद्वय प्रधानमन्त्री केपी शर्मा ओली र पुष्पकमल दाहाल प्रचण्डको बुईं चढेको आरोप लगाएको छ।
प्रदेशकै नेताहरुको स्वविवेक र स्वामित्वमा पूरा हुने काममा एक पार्टीका अध्यक्षद्वयको बुइँ र बैसाखी टेकेर निर्णय गरिएको भन्दै मुख्यमन्त्री पोखरेलको क्षमतामाथि प्रश्न उठाएको छ।
प्रमुख प्रतिपक्ष दलका नेता वीरेन्द्र कनोडियाले सभामा बोल्दै प्रदेश र प्रदेशका मुख्यमन्त्री पोखरेल आफैंले समाधान गर्नुपर्ने विषयमा राष्ट्रिय नेताहरुको आडमा एकलौटी निर्णय भएको बताए। उनले भने, ‘मुख्यमन्त्री पोखरेल आफैं राष्ट्रिय रुपमा नेतृत्व गर्ने व्यक्ति हुनुहुन्छ। समस्या आए समाधान खोज्न सक्ने व्यक्तित्व हुनुहुन्छ। तर, उहाँले नेकपा अध्यक्षद्वय केपी शर्मा ओली र प्रचण्डको बुइँ चढेर यस्तो निर्णय गर्नुभयो।’
दाङलाई राजधानी बनाउने प्रस्ताव एकलौटी रुपमा ल्याउँदा राजनीतिक स्वार्थ झल्किएको उनको भनाइ थियो। प्रदेश ५ को जस्तो सालिन र रचनात्मक प्रतिपक्ष अन्त नरहेको बताउँदै प्रदेश सरकारका हरेक कदममा साथ दिँदै आएको स्मरण गराए। प्रदेशका विषयमा पनि छलफल गरेको भए सहमतिका साथ निर्णय गर्न सहयोग गर्ने बताए।
उनले भने, ‘दुई तिहाइको दम्भमा पेलेर जाने नगर्नुहोस्। राजधानी जस्तो विषय सवैको स्वामित्व हुनुपर्छ। सर्वसम्मतिबाट पास गरेका छौं भनेर गर्व गर्ने विषय बनाउनुहोस्।’
ठाउँको भन्दा पनि प्रक्रियाको विरोध आफ्नो रहेको उनले बताए। प्रस्ताव ल्याउँदा राजनीतिक सहमति खोज्नुपर्ने उनी बताउँछन्। उनी भन्छन्, ‘प्रदेशको राजधानी र नामको टुंगो लाग्ने दिन खुशीको दिन हुनुपर्ने। यस्तो ऐतिहासिक निर्णयको दिन बाहिर निषेधाज्ञा छ। तानाशाही शैलीमा पास गराउन खोजिएको छ। के यो लोकतान्त्रिक मूल्य मान्यता हो?’
राजनीतिक स्वार्थभन्दा पनि सवैको हितलाई मध्यनजर गरेर प्रस्ताव आउनुपर्ने उनी बताउँछन्। उनले भने, ‘राष्ट्रलाई सर्वोपरी राखेर निर्णय हुनुपर्छ। तर, अहिले भेगीय स्वार्थबाट प्रेरित भएर प्रस्ताव आयो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
