काठमाडौं- काभ्रेपलाञ्चोकस्थित पनौती नगरपालिकाले असोज १३ गते विद्यालय सञ्चालन गर्नेसम्बन्धी सूचना निकाल्यो।
सूचनामा वैकल्पिक रुपमा शिक्षण सिकाइ भइरहेको अवस्थामा शिक्षा, विज्ञान तथा प्रविधि मन्त्रालयले निकालेको ‘विद्यार्थी सिकाइ सहजीकरण निर्देशिका,२०७७ को नियम ३३ (२) अनुसार र नगरपालिकाको शिक्षा शाखाले बनाएको केही मापदण्ड अपनाएर विद्यालय सञ्चालन गर्ने उल्लेख गरिएको छ।
नगरपालिकाले सुचना निकाले लगत्तै सामाजिक सञ्जालमा विरोध हुन थाल्यो। चाडबाडको मुखमा विद्यालय सञ्चालन गर्न खोजेर संस्थागत विद्यालयमार्फत् खर्च असुल्न खोजेको तथा कोरोना महामारीको बेला विद्यालय खोलेर नयाँ जोखिम मोलेको भन्दै विरोध भइरहेको छ।
यसबारे नगरपालिकाले भने केन्द्र सरकारले लकडाउन तथा निषेधाज्ञा गरे र अभिभावकले नै यसबारे विरोध गरे विद्यालय सञ्चालन नहुने बताएको छ। पनौति नगरपालिका वरिष्ठ प्रशासकीय अधिकृत इन्द्रप्रसाद अधिकारी सामाजिक सञ्जालमा आफूहरुलाई बुद्धि नै नभएको भनेर भनिएको भन्दै दुखमनाउ गरे।
‘कोरोना भाइरसको सङ्क्रमण कम रहेको र दशैं अघि विद्यालय खोल्दा शैक्षिक माहोल बन्छ भनेर विद्यालय खोल्ने निर्णय गरियो,’ उनले भने, ‘तर हामीलाई बुद्धि नै नभएको भनेर सामाजिक सञ्जालमा गाली गरियो। केन्द्र सरकारले र अभिभावकले नै विद्यालय नखोल्ने भने खोल्दैनौं।’
‘कोरोनाको अबस्था भयावह नभएकाले विद्यालय खोल्ने निर्णय गरेका हौँ’
पनौति नगरपालिकाले दिएको जानकारी अनुसार पछिल्लो समय कोरोना सङ्क्रमितको सङ्ख्या २३ जना छ भने मृत्यु हुनेको सङ्ख्या २ जना रहेको छ। सङ्क्रमितहरु होम आइसोलेसनमा बसिरहेका छन्। नगरपालिकाका वरिष्ठ अधिकृत इन्द्रप्रसाद अधिकारी सबै वातावरण हेरेर नै विद्यालय खोल्ने निर्णय गरिएको बताउँछन्। ‘पछिल्लो समय सङ्क्रमित बढेका छैनन्। त्यही विचार पुर्याएर विद्यालय खोल्ने निर्णय गरिएको हो,’ उनले भने, ‘न्युनतम मापदण्ड पुर्याएर विद्यालय खोल्न सकिन्छ भन्ने नगरपालिकाको धारणा हो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
