सार्वजनिक बसमा पूर्ण सिट क्षमतामा यात्रु राख्ने प्रस्ताव सिसिएमसी पठाइएको छ : मन्त्री नेम्बाङ

अटो

नेपाल लाइभ शुक्रबार, असोज १६, २०७७ २२:१८

काठमाडौं- भौतिक पूर्वाधार तथा यातायात एवम् सहरी विकासमन्त्री बसन्तकुमार नेम्बाङले हवाई जहाजमा जस्तै सार्वजनिक बसमा समेत सिट क्षमता जति नै यात्रु राख्नेबारे स्वस्थ्य मापदण्ड संशोधनका लागि प्रस्ताव गरिएको बताएका छन्। मापदण्ड संशोधनका लागि सिसिएमसीमा प्रस्ताव गरिएको उनको भनाइ छ।

मन्त्री नेम्बाङले हवाई उडान पूर्ण सिट क्षमतामा सञ्चालन भएको र सरोकारवालाहरुबाट गुनासोसमेत आएकाले सार्वजनिक यातायात सञ्चालन मापदण्ड संशोधनका लागि कोरोना क्राइसिस म्यानेजमेन्ट सेन्टर (सिसिएमसी) मा प्रस्ताव पेस गरिएको समेत बताए।

उनले मापदण्ड संशोधन भएर आएपछि भने स्वास्थ्य मापदण्ड अपनाउँदै सार्वजनिक यातायात सामान्य अवस्थामै सञ्चालन हुने बताए।

दसैंतिहारसम्म सार्वजनिक यातायात सहज भइसक्ने उनको भनाइ छ। शुक्रबार संघीय संसद अन्तर्गत विकास तथा प्रविधि समितिको छलफलमा सांसदहरुले उठाएको प्रश्नको जवाफ दिदै मन्त्री नेम्बाङले यस्तो बताएका हुन्।

विश्वव्यापी कोरोना महामारी र भारी वर्षाका कारण विभिन्न राजमार्ग तथा पुलहरुमा क्षति पुग्दा सार्वजनिक यातायात सञ्चालनमा कठिनाई भए पनि नेपालीहरुको ठूला चाडपर्व दसैंतिहार अगावै सहज भइसक्ने उल्लेख गरेका हुन्।

प्राकृतिक विपतलाई रोक्न नसकिए पनि त्यसको व्यवस्थापनमा मन्त्रालय तदारुकताका साथ लागेको मन्त्री नेम्वाङको दाबी छ। ‘भारी वर्षाका कारण बाटोमा क्षति पुगेको छ। राजमार्गहरु निर्वाध रुपमा सञ्चालन गर्नका लागि मन्त्रालयले चौविसै घण्टा काम गर्ने योजना बनाएको छ। २ सय ५० भन्दा बढी स्थानमा निर्माण उपकरण राखेर बाटो सोहोर्ने, पहिरो पन्छाउने काम भइरहेको छ,' उनले भने।

मन्त्री नेम्बाङले बढ्दो कोरोना संक्रमणबीच अस्तव्यस्त अर्थतन्त्रलाई चलायमान गर्न स्वास्थ्य मापदण्ड पालना गर्दै लामो, मध्यम र छोटो दुरीको सवारी साधन खुल्ला गरिएको प्रष्ट्याए। सरकारले कडाईका साथ निर्णय गरेर मात्र नहुने उल्लेख गर्दै उनले सेवाग्राही, व्यवसायी सरोकारवाला सबै अनुशासित भएर लाग्नु पर्ने उल्लेख गरे।

त्यस्तै भौतिक पूर्वाधार तथा यातायात मन्त्रालायका सचिव देवेन्द्र कार्कीले भारी वर्षाका बाबजुद पनि देशभरको सडकको अवस्था राम्रो रहेको दीबी गरे। ‘हाम्रो मातहत रहेका सडकहरुको अवस्था राम्रै छ। ग्रामिण सडकहरुका अवस्था अलि नाजुक छ,' उनले भने, 'ग्रामीण सडकहरुको मर्मत सम्भार स्थानीय तह तथा प्रदेश सरकारको जिम्मामा भएपनि हामीले समेत गरिरहेका छौं।’

त्यस्तै सडक विभागका महानिर्देशक केशवकुमार शर्माले प्राकृतिक प्रकोपका कारण अवरुद्ध सडक रातभर काम गरेर भएपनि सञ्चालनमा ल्याइएको बताए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

गाडीको ठक्करबाट पैदलयात्रीको मृत्यु

बिहान ९ बजे देखि नै चर्कीदै शिक्षक आन्दोलन, दिउँसो राप्रपाको प्रदर्शन

राप्रपाले आज काठमाडौंमा प्रदर्शन गर्दै, सुरक्षा व्यवस्थामा कडाई