काठमाडौं- चिकित्सा शिक्षा सुधारका माग राख्दै १३ दिनदेखि अनसनरत डा गोविन्द केसीको स्वास्थ्य अवस्था कमजोर बन्दै गएको छ। त्रिवि शिक्षण अस्पतालमा अनसनरत डा केसीमा जिउ गल्ने चक्कर लाग्ने, धड्कन बढ्ने, शरीरका हातखुट्टा बाँउडिनेलगायतका समस्या देखिन थालेको त्रिवि शिक्षण अस्पतालले जानकारी दिएको छ।
डा केसीको रगतमा डब्लुबिसीको मात्रा कम भएको, सुगर कम भएको र पोटासियमलगायतका तत्व पनि कम देखिएको डा केसीको स्वास्थ्य अवस्था निगरानी गरिरहेका अस्पतालका डा सुवासप्रसाद आचार्यले जानकारी दिएका छन्।
चिकित्सकहरूले उनको अवस्था खराब हुँदै गएपनि डा केसीले कुनै उपचार लिन नमानेको डा केसीकी सहयोगी डा तोषिमा कार्कीले जानकारी दिएकी छन्। डा केसीले रगत जाँच गर्न नमानेको र कुनै पनि बेला इमर्जेन्सी मेडिसिन दिन आवश्यक रहेको चिकित्सकहरूले जानकारी गराएको सहयोगी डा कार्कीले बताइन्।
कुनै पनि बेला औषधि दिनुपर्न सक्ने अवस्था रहेकाले उनको नसा भने खोलिएको र स्लाइन चलाइएको डा कार्कीले उल्लेख गरेकी छन्।
चिकित्सकहरूले मुटुको चाल तलमाथि हुन सक्ने, कुनै पिन बेला आइयियूमा सार्नुपर्ने अवस्था रहेकोसमेत अस्पतालले उल्लेख गरेको छ। उनमा रोग प्रतिरोधात्मक क्षमता कम हुँदै गएको समेत डा कार्कीले बताइन्।
डा गोविन्द केसीको कोरोना परीक्षणको पिसिआर रिपोर्ट नेगेटिभ आएको छ। बिहीबार संकलन गरिएको उनको स्वाबको शनिबार बेलुका नेगेटिभ रिपोर्ट आएको डा केसीका सहयोगी डा तोषिमा कार्कीले जानकारी दिएकी छन्। अस्पतालमा अनसन जारी राखेकै अवस्थामा डा केसीको बिहीबार स्वाब संकलन गरिएको थियो।
१३ दिनअघि जुम्लामा अनसन सुरु गरेका डा केसी असुरक्षाको महसुस भएको भन्दै मंगलबार काठमाडौं आएका थिए। काठमाडौं आएपछि सरकारले जबर्जस्ती उनलाई राष्ट्रिय ट्रमा सेन्टरमा लगेको थियो। तर त्यहाँबाट स्वेच्छिक डिस्चार्ज लिएर उनी शिक्षण अस्पताल गएका थिए।
डा केसीको समर्थनमा युवाहरूले देशका विभिन्न स्थानमा प्रदर्शन गर्दै आएको छ। तर उनका माग सम्बोधन गर्न सरकारले कुनै चासो देखाएको छैन। आफ्ना माग पूरा नहुन्जेल आफूले अनसन स्थगित नगर्ने डा केसीले बताउँदै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
