काठमाडौं- संसदको सार्वजनिक लेखा समितिले पूर्व सूचना प्रविधि तथा सञ्चारमन्त्री गोकुल बास्कोटालको ७० करोड घुस डिल गरेको प्रकरणमा अनुसन्धानको प्रगति विवरण पेश गर्न पत्र लेखेको छ।
त्यस्तै समितिले नेपाल वायुसेवा निगमको वाइडबडी खरिदमा भएको अनियमितताबारे भइरहेको अनुसन्धानको प्रगति विवरण पेश गर्न भनेको छ। समितिको बैठकमा संसदको समितिले अनुसन्धान गर्न अख्तियारमा विवरण पठाउने तर अख्तियारले कुनै पनि जवाफ नदिने गरेको भन्दै आलोचना भएपछि पत्र पठाएको हो।
बिहीबारको समितिको बैठकमा पनि नेपाली कांग्रेसका सांसद मिनेन्द्र रिजालले लेखा समितिले पठाएका सिफारिसबारेमा अख्तियारबाट प्रगति विवरण माग्नुपर्ने भनेका थिए। ‘समितिले हल्लाखल्ला गरेर अनियमितता भएको प्रतिवेदन सार्वजनिक गर्ने तर अख्तियारले उक्त कुरामा के भइरहेको छ जानकारी नै नदिने कार्यले समितिको काममा प्रश्न उठाएको छ’ रिजालले सभापतिको ध्यानाकर्षण गराउँदै भने‚ ‘अख्तियारले मुद्दा नचल्ने भए नचल्ने चल्ने भए अनुसन्धान कहाँ पुगेको छ भन्ने जानकारी दिनुपर्छ।’
सुरु सुरुमा अख्तियारले केही महिना लाग्ने भनेको तर अहिले मौन बसेकाले समितिका तर्फबाट फलोअप हुनुपर्ने माग उनले गरेका थिए।
अन्य सांसदहरुले पनि लेखा समितिको बैठकमा यस्ता प्रश्न उठाउने गरेका थिए। समितिमा पटक पटक प्रश्न उठेपछि बिहीबार अख्तियारलाई पत्र लेखिएको समितिका सभापति भरत साहले बताए। समितिले नेपाल वायुसेवा निगम र पूर्व सञ्चारमन्त्री गोकुल बाँस्कोटा प्रकरणमा के अनुसन्धान भइरहेको छ प्रगति विवरण पेश गर्न पत्र लेखेको लेखा समितिका सचिव रोजनाथ पाण्डेले बताए।
बाँस्कोटाले सेक्युरिटी प्रेस खरिदमा ७० करोड रुपैयाँ कमिसन डिल गरेको भनी अडियो सार्वजनिक भएको थियो। बाँस्कोटाले उक्त प्रकरण बाहिरिएपछि पदबाट राजीनामा समेत दिएका थिए। उनको राजीनामापछि अख्तियारले धेरै अनुसनधान गरेको छैन।
अख्तियारले केही समयअघि घुस दिने कुराकानी गरेका विजयप्रसाद मिश्रलाई अख्तियार उपस्थित हुनु भनी सार्वजनिक सूचना जारी गरेको थियो। कोरोना महामारीको समयमा उनी जापान रहेको र अख्तियार उपस्थित हुन नसक्ने मौका पारेर सूचना जारी गर्दै बाँस्कोटालाई सफाई दिन खोजिएको भन्दै आलोचना भइरहेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791869951.jpg)
-1786602170.png)
