काठमाडौं- नेपाल धितोपत्र बोर्डले हिमालयन डिष्ट्रिलरीकी सञ्चालिका रहिशा शाह श्रेष्ठले सञ्चालक पदबाट हटेको एक वर्ष पनि नपुगी शेयर बिक्री गरे पछि कारबाही गरेको छ। बोर्डले शेयर बिक्री गराउने ब्रोकर कम्पनी इन्भेष्टमेन्ट म्यानेजमेन्ट नेपाल सहित श्रेष्ठलाई कारबाही गरेको हो।
हिमालयन डिष्टिलरीको पूर्व संचालक श्रेष्ठले सूचिकृत संगठित संस्थाको संस्थागत सुशासनसम्बन्धी निर्देशिका, २०७४ को दफा १४ को उपदफा (६) को व्यवस्था विपरीत संचालक पदबाट हटेको एक वर्ष नपुग्दै विभिन्न मितिमा हिमालयन डिष्टिलरी लि.को शेयर बिक्री गरेको बोर्डले जनाएको छ।
साथै उक्त शेयर कारोवारमा संलग्न धितोपत्र दलाल व्यवसायी इन्भेष्टमेन्ट म्यानेजमेन्ट नेपालले श्रेष्ठको बारेमा धितोपत्र व्यवसायी (धितोपत्र दलाल तथा धितोपत्र व्यापारी) नियमावली, २०६४ को नियम २९ को उपनियम (१) को व्यवस्था बमोजिमको पूर्ण विवरण सहितको अभिलेख नराखेको बोर्डले जनाएको छ।
कम्पनीले सम्पत्ति शुद्धीकरण तथा आतंककारी क्रियाकलापमा वित्तीय लगानी निवारण निर्देशन, २०७६ को दफा ६ को उपदफा (२) तथा दफा १० बमोजिम ग्राहक पहिचानलगायत अन्य आवश्यक जानकारी अद्यावधिक राख्नुपर्नेमा सोको पूर्ण रुपमा पालना नगरेको बोर्डको आरोप छ।
प्रणालीमा बिक्री आदेश प्रविष्ट गर्नुअघि उक्त कारोवार धितोपत्रसम्बन्धी ऐन, नियम, विनिमय तथा निर्देशन बमोजिम गर्न मिल्ने नमिल्ने सम्बन्धमा आवश्यक सावधानी अपनाएको नदेखिएको सन्दर्भमा बोर्डले आवश्यक छानविन गरेको थियो।
धितोपत्रसम्बन्धी ऐन, २०६३ को दफा १०१ को उपदफा (७) मा धितोपत्रसम्बन्धी ऐन वा ऐनअन्तर्गत बनेको नियम वा विनियम वा सोअन्तर्गत जारी गरिएका कुनै आदेश वा निर्देशन वा बोर्डले तोकिदिएका शर्तहरुको उल्लंघन गरेमा वा आफूले गर्नुपर्ने काम नगरेमा वा गर्न नहुने काम गरेमा त्यस्तो व्यक्तिलाई बोर्डले पचास हजारदेखि पचहत्तर हजार रुपैयाँसम्म जरिवाना गर्न सक्ने व्यवस्था भएकोमा श्रेष्ठलाई पचहत्तर हजार रुपैयाँ जरिवाना गरेको हो।
धितोपत्रसम्बन्धी ऐन, २०६३ को दफा १०१ को उपदफा (६) मा कसैले धितोपत्रसम्बन्धी ऐन वा ऐनअन्तर्गत बनेको नियम वा विनिमय बमोजिम पुर्याउनुपर्ने रीत नपुर्याई धितोपत्र निष्काशन गरेमा, धितोपत्र बजार वा धितोपत्र व्यवसायीको हैसियतले धितोपत्र कारोबार संचालन गरे गराएमा त्यस्तो काम गर्ने गराउने व्यक्तिलाई बोर्डले पचास हजार रुपैयाँदेखि एक लाख पचास हजार रुपैयाँसम्म जरिवाना गर्न सक्ने व्यवस्था छ। यसै व्यवस्थालाई टेकेर बोर्डले कम्पनीलाई एक लाख पचास हजार रुपैयाँ जरिवाना गराएको हो।
बोर्डले सञ्चालक पदबाट हटेको एक वर्ष पनि नपुगी शेयर बिक्री गरेपछि ७५ हजार रुपैयाँ जरिवानासहित कारबाही गरेको हो। त्यस्तै उक्त शेयर बिक्री गराउने ब्रोकर कम्पनी इन्भेष्टमेन्ट म्यानेजमेन्ट नेपाललाई एक लाख ५० हजार रुपैयाँको जरीवानासहित कारोबार गरेको हो।
धितोपत्र बोर्डले सूचिकृत कम्पनीको सञ्चालकलाई पहिलो पटक यस्तो कारबारी गरेको हो। धितोपत्रसम्बन्धी कानुनको पूर्ण रुपमा पालना गर्दै दोस्रो बजारको कारोबारलाई स्वच्छ पारदर्शी रुपमा अगाडि बढाउने बोर्डले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1767770856.png)
