काठमाडौं- इंग्लिस प्रिमियर लिगमा अक्टोवर १ देखि दर्शकलाई खेल हेर्न दिने गरी गरिएको तयारी अहिले नै कार्यान्वयन नहुने भएको छ। यसअघिको तयारीअनुसार नै क्लबहरुले अक्टोवर १ देखि दर्शकलाई प्रत्यक्ष खेल हेर्न दिन सरकारसमक्ष आग्रह गरेका थिए। जसमा अहिले कोरोना संक्रमणको दर बढिरहेकाले सम्भव नहुने बताइएको छ।
बेलायतमा सीमित दर्शकलाई शारीरिक दुरी बनाएर राखेर खेल हेर्न दिने गरी तयारी भइरहेको थियो। त्यसैले प्रिमियर लिग क्लबहरु पनि दर्शक फर्कने आशमा थिए। रंगशाला दर्शकका लागि सुरक्षित सार्वजनिक स्थानहरुमध्ये एक हुने गरी त्यसमा सीमित दर्शकलाई शारीरिक दुरीसहित अन्य स्वास्थ्य सुरक्षाका उपाय अपनाएर राख्न सकिने क्लबहरुको धारणा छ।
दर्शकबिनाको खेल गरिरहँदा कोरोना माहामारीका कारण कमजोर बनेको फुटबल बजारमा अझ ठूलो घाटा लाग्न सक्ने डर बढेको लिगसम्बद्धहरु बताइरहेका छन्।
अक्टोवर १ देखि खेल हेर्न दर्शकलाई अनुमति दिने तयारी भइरहँदा पनि त्यसमा पुनर्विचार गरिने बेलायतका प्रधानमन्त्री बोरिस जोनसनले गएको हप्ता बताएका थिए। जसमा यो निर्णयबाट पछि नहट्न क्लबहरुले गरेको आग्रह अहिले नै कार्यान्वयन नहुने भएको हो। थोरै संख्यामा दर्शकलाई अनुमति दिँदै अभ्यास गरिरहँदा ठूलो संख्यामा दर्शक उपस्थित गराउन सक्ने अवस्था नआइसकेको प्रधानमन्त्री जोनसनले बताएका छन्।
प्रिमियर लिगका प्रमुख कार्यकारी रिचार्ड मास्टर्स दर्शक नहुँदा क्लबहरुलाई ७० करोड पाउण्ड घाटा हुन सक्ने देखिएको बताउँछन्। गएको सिजनको पछिल्ला खेलहरुमा नै क्लबलाई आधा बिलियन पाउण्ड घाटा लागेर कठीन भइरहँदा अझै उही परिस्थिति जटिल हुने उनले बताएका छन्।
‘हामीले जति सक्दो छिटो दर्शकलाई खेल हेर्न दिने वातावरण बनाउनुपर्छ। अहिले फुटबलमा कमी भइरहेको विषय पनि त्यही हो। आर्थिक रुपमा र अन्य रुपमा समेत। अबको प्रमुख लक्ष्य नै दर्शकलाई खेल हेर्न दिनेमा केन्द्रित हुनुपर्छ’ उनले भनेका छन्।
यसअघि ब्राइटन र चेल्सीबीच एमेक्स स्टेडियममा भएको प्रिसिजन मैत्रीपूर्ण खेलमा समर्थकहरु उपस्थित हुन पाएका थिए। जुन झण्डै ६ महिनापछि दर्शकसहित देखिएको पहिलो फुटबल खेल हो। जहाँ २५ सय दर्शकले प्रत्यक्ष खेल हेरे।
शारीरिक दुरी बनाएर नै राखिएका दर्शकहरुका लागि भित्र आउँदा र बाहिर निस्कँदा पनि दुरी कायम गरिएको थियो। रंगशालामा दर्शकसहित खेल गर्न सकिन्छ कि सकिँदैन भन्नेबारेमा त्यो एउटा प्रयोग पनि थियो। गएको मार्चमा कोरोना माहामारीका कारण फुटबल रोकिएपछि जुनमा सुरु भएको खेल दर्शकबिना बन्द रंगशालामा गरिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
