टी–२० विश्वकप छनोट : युएई, कतार र कुवेत दोस्रो चरणमा छानिए

सुरक्षा/अपराध

नेपाल लाइभ शनिबार, वैशाख १५, २०७५ ०२:५४

काठमाडौं– सन् २०२० मा अस्ट्रेलियामा हुने टी–२० क्रिकेट विश्वकप प्रतियोगिताको अन्तर्गत एसिया छनोटको समूह 'ए' बाट युएई, कतार र कुवेत दोस्रो चरणमा पुगेका छन्।

कुबेतमा सम्पन्न छनोटमा युएई समूह विजेता तथा कतार समूह उपविजेताको रुपमा दोस्रो चरणमा पुगेका हुन्। उपाधिका लागि भएको प्रतिस्पर्धामा युएईले कतारलाई हरायो। तेस्रो स्थानका लागि भएको खेलमा कुवेत विजयी भयो। कुवेतले साउदी अरेबियालाई ५ विकेटले पराजित गर्दै दोस्रो चरणमा स्थान पक्का गर्‍यो।

एसियाको समूह 'ए' बाट छनोट भएका ३ टिम र समूह 'बी' बाट छनोट हुने ३ टिम गरी कुल ६ टिमबीच दोस्रो चरणको छनोट हुनेछ।

नेपाल एसिया छनोटको समूह 'बी' मा छ। नेपाल सम्मिलित समूहमा भुटान, चीन, मलेसिया, म्यानमार, सिंगापुर र थाइल्यान्ड छन्। समूह 'बी' को छनोट मलेसियामा आगामी २ देखि १३ अक्टोबरसम्म हुनेछ।

दोस्रो चरणको छनोटमा सहभागी हुने ६ टिम मध्ये उत्कृष्ट २ टिमले अन्तिम चरणको छनोट खेल्न पाउनेछन्।

अन्तिम चरणको छनोटमा १४ टिमबीच प्रतिस्पर्धा हुनेछ। जहाँ विभिन्न महादेशबाट छानिएका ८ टिम र सन् २०१८ को डिसेम्बरसम्म शीर्ष १० वरीयता भित्र नपर्ने ६ टिम गरी १४ टिम हुनेछन्। १४ टिम मध्ये शीर्ष ६ टिम सन् २०२० को विश्वकपमा छनोट हुनेछन्।

छनोट पार गरेका ६ टिम र शीर्ष वरीयता पाएका १० टिम गरी कुल १६ टिमबीच सन् २०२० को टी–२० विश्वकपमा प्रतिस्पर्धा हुनेछ।

नेपालको सम्भावना
नेपालले सन् २०२० को विश्वकप खेल्न तीन चरणको छनोट पार गर्नु पर्नेछ।

नेपालले पहिलो चरणको छनोटमा भुटान, चीन, मलेसिया, म्यानमार, सिंगापुर र थाइल्यान्डसँग भिड्नेछ। यहाँ शीर्ष ३ भित्र परे नेपाल दोस्रो चरणमा छनोट हुनेछ।

दोस्रो चरणको छनोटमा एसियाको समूह 'ए' र 'बी' का शीर्ष ३-३ टिम गरी ६ टिम बीच प्रतिस्पर्धा हुनेछ। एसिया छनोटको दोस्रो चरणमा पुग्ने ६ टिम मध्ये २ टिम मात्र अन्तिम चरणको छनोटमा पुग्नेछन्। पहिलो चरण पार गरेको अवस्थामा नेपालले अन्तिम चरणमा पुग्न ६ टिम मध्ये शीर्ष २ भित्र पर्नु पर्नेछ।

अन्तिम चरणमा नेपाल पुगे विश्वभरबाट छनोट पार गरेका १४ टिमसँग खेल्नेछ। १४ मध्ये शीर्ष ६ भित्र परे नेपालले सन् २०२० को टी–२० विश्वकप खेल्नेछ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

हाजिरी जमानीमा छुटे प्रमुख अध्यागमन अधिकृत भट्टराई

भारतका शीर्षस्थ माओवादी नेता बसवराजुसहित २७ लडाकु मारिए

आगामी मनसुनमा सरदरभन्दा बढी वर्षा हुने प्रक्षेपण, यस्तो छ तापक्रमको आँकलन