काठमाडौं- भक्तपुरस्थित चाँगुनारायण नगरपालिकाले सामुदायिक विद्यालयमा अध्ययन गर्ने छात्राहरुलाई प्रत्येक वर्ष ४ हजार रुपैयाँ प्रदान गर्ने भएको छ। नगरबासीको ध्यान सामुदायिक विद्यालयमा आकर्षित गर्न र छात्राहरूको शिक्षामा समेत सहभागिता बढाउन यस्तो योजना ल्याइएको नगरका प्रमुख सोमप्रसाद मिश्रले जानकारी दिए।
यस्तै नगरले विद्यालय उमेरका सबै बालबालिकाको शतप्रतिशत भर्ना दर कायम गर्न पनि यसले सहयोग गर्ने मेयर मिश्रको भनाइ छ। त्यस्तै सानो कक्षामा भर्ना हुने र विद्यालय शिक्षा पूरा नगर्ने समस्याको निराकरणका लागि पनि योजना ल्याइएको मिश्रले जानकारी दिए। 'बचत खाता छोरीको, सुरक्षा जीवन भरीको' कार्यक्रमअन्तर्गत नगरपालिकाभित्रका सामुदायिक विद्यालयमा अध्ययनरत छात्राका नाममा यस्तो योजना ल्याइएको हो।
'यो वर्ष सबै सामुदायिक विद्यालयमा पढ्ने छात्राका नाममा भएको बैंक खातामा नगरका तर्फबाट ४ हजार रुपैयाँ राखिन्छ। प्रत्येक वर्ष यसरी रकम राखिँदै जान्छ। आगामी वर्षमा यो रकम अझ बढाउने लक्ष्य छ,' उनले भने। प्रत्येक वर्ष संकलन भएको रकम बैंकमा बचत खाताका रूपमा संकलन हुँदै जानेछ।
तर यस्तो रकम भने कुनै पनि छात्राले २० वर्ष नपुगी निकाल्न पाउँदैनन् भने यसका लागि कक्षा १२ को अध्ययन पूरा भएको पनि हुनुपर्छ। यदि बीचैमा कक्षा छोडे यस्तो रकम नगरका नाममा नै फिर्ता हुने मेयर मिश्रले जानकारी दिए। कम्तीमा १२ कक्षा सबै छात्राले पास गरुन् भन्ने नगरको उद्देश्य रहेकाले यस्तो व्यवस्था गरिएको उनले बताए।
२० वर्ष कटेपछि मात्र रकम पाइने र विद्यालय पनि छोड्न नहुने भएकाले यसले बालविवाह रोक्नसमेत सहयोग गर्ने मिश्रको भनाइ छ। यदि १२ कक्षा पूरा गरेको तर उच्च शिक्षाका लागि सो रकम खर्च गर्न चाहेमा नगरसँग लिखित प्रतिवद्धता गरी आवश्यक कागजात पेस गरी त्यसरी जम्मा भएको रकम लिन सकिने जानकारी मेयर मिश्रले दिए।
यसका लागि नगरले नेपाल बैंक लिमिटेडसँग खाता व्यवस्थापन र उपलब्धमध्ये अधिकतम ब्याज प्रदान गर्नका लागि सम्झौतासमेत गरिसकेको छ। बैंकले सुरुमा सबै खातामा १-१ सय रुपैयाँसमेत जम्मा गरिदिने भएको छ। सम्झौतामा नेपाल बैंक लिमिटेडको तर्फबाट प्रमुख कार्यकारी अधिकृत श्री कृष्णबहादुर अधिकारी तथा चाँगुनारायण नगरपालिकाको तर्फबाट नगर प्रमुख श्री सोमप्रसाद मिश्रले बुधबार हस्ताक्षर गरेका हुन्।
सम्झौता बमोजिम शून्य मौज्दातमा खोलिएका त्यस्ता खातामा बैंकले बचत खाताहरुमा प्रदान गर्ने उच्चतम ब्याजदर प्रदान गर्ने, बैंकमा खोलिएको खातामा रकम जम्मा गर्ने/झिक्नेलगायतका अन्तरबैंक सेवामा कुनै पनि शुल्क नलाग्नेलगायतका अन्य सुविधा प्रदान गर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772949758.png)
-1764146706.png)
