काठमाडौं– झापाको शिवसताक्षी नगरपालिका–११ स्थित सताक्षीधाम जाने भित्री सडकको किनारमा भएको एक युवकको हत्याकाण्डका अभियुक्त पक्राउ परेका छन्। भदौ १७ गते सडक किनारमा मृत अवस्थामा फेला परेका २९ वर्षीय गोमनसिंह मगरको हत्यामा संलग्न भएको आरोपमा प्रहरीले एक नजनालाई पक्राउ परेपछि उक्त हत्याकाण्ड सुल्टिएको प्रहरीले जनाएको छ।
प्रदेश १ प्रहरी कार्यालय विराटनगर, संघीय प्रहरी इकाई कार्यालय धरान र जिल्ला प्रहरी कार्यालय झापाको संयुक्त टोलीले हत्यामा संलग्न भएको आरोपमा शविसताक्षी–८ कै मनकुमार लिम्बुलाई पक्राउ गरेको हो।
हत्या भएको जानकारी पाउनासाथ तालिम प्राप्त कुकुर समेत परिचालन गरेर प्रहरी अनुसन्धान गरेको थियो।
अनुसन्धानका क्रममा लिम्बुले भदौ १६ गते साँझ ६ बजे गोमनसिंहलाई घुम्न जाऔं भनी घरबाट बोलाएर लगेको खुलेको छ। साथीले बोलाएपछि मोटरसाइकलमा आएका गोमनसिंहलाई सताक्षीधाम मन्दिरतर्फ हावा खान जाम भनी उनको मोटरसाइकलको पछाडि लिम्बु बसेर गएका थिए।
मोटरसाइकल पछाडि बसेकै बेला लिम्बुले पछाडिबाट गोमन सिंहलाई धारिलो हतियार कर्दले पटक–पटक घाँटीमा रेटी हत्या गरेको अनुसन्धानबाट खुल्न आएको जिल्ला प्रहरी कार्यालय झापाले जनाएको छ।
लिम्बुले हत्यामा प्रयोग गरेको कर्द र उनले बोकेको मोबाइल समेत बरामद गरिएको छ। उनीहरुबीच भएको आर्थिक लेनदेन कारोबारमा असमझदारी भइ बढेको मनमुटाबले हत्या भएको प्रारम्भिक अनुसन्धानको क्रममा खुल्न आएको झापा प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
