काठमाडौं- ‘भदौ १८ गते राति ९ बजे स्वयम्भूस्थित मनमोहन मेमोरियल मेडिकल कलेज तथा शिक्षण अस्पतालको आकस्मिक कक्षमा २०-३० जनाको समूह छिर्यो। गुण्डागर्दीको शैलीमा आकस्मिक कक्षमै दोहोरो भिडन्त र रक्ताम्य भयो। उपचार गर्न ल्याइएका घाइते थप घाइते भए’ अस्पताल प्रशासनले निकालेको विज्ञप्तिमा उल्लेख छ।
आकस्मिक कक्षमै आएर बितण्डा मच्चाउने र तोडफोड गरेकाले सेवा दिन नसक्ने र बितण्डा मच्चाउनेलाई कडाभन्दा कडा कारबाही हुनुपर्ने माग विज्ञप्तिमा गरिएको छ। अस्पताल प्रशासनको सिसी टिभी फुटेजमा पनि आकस्मिक कक्षमै तोडफोड र झगडा गरेको प्रष्ट देखिन्छ।
संवेदनशील मानिएको अस्पतालकै आकस्मिक कक्षमा पुगेर किन झगडा र तोडफोड भयो? यसको गुत्थी थाहा पाउन झगडा गर्ने युवकहरुको विगत कोट्याउनुपर्ने हुन्छ।
झगडा गर्ने युवकहरु ढुंगेधारा र रानीवनका युवाहरू हुन्। महानगरीय प्रहरी परिसर काठमाडौंका एसपी सोमेन्द्र राठौरका अनुसार यी दुई टोलका युवाहरु बेलाबेलामा फुटसल‚ भलिबल म्याच खेलिरहन्थे। झगडा हुने अघिल्लो दिन अर्थात् भदौ १७ गते पनि उनीहरुबीच भलिबल म्याच भएको थियो। उक्त खेलमा दुई पक्षका युवाबीच विवाद समेत भएको र सामान्य भनाभन भएको थियो।
‘त्यसको भोलिपल्ट साँझ ढुंगेधाराका युवाहरू मोटरसाइकलमा रानीवन गएको देखिन्छ,’ एसपी राठौरले भने, ‘अघिल्लो दिन विवाद हुनु र भोलिपल्ट युवाको हुल नै आफ्नो टोलमा आएपछि झगडा गर्न आएको भन्दै रानीवनका युवाहरु मिलेर ढुंगेधाराका युवालाई लखेट्न थालेपछि झडप भएको हो।’
रानीवनबाट सुरु भएको झगडा ढुंगेधारासम्म आइपुगेको थियो। सो क्रममा दुवै पक्षका ४ जना घाइते भएका थिए। ‘घाइतेलाई नजिकैको मनमोहन अस्पतालमा उपचारका लागि लगिएको थियो। फेरि त्यहाँ दुवै पक्षका युवा पुगेछन्। त्यहाँ पनि विवाद भएपछि आकस्मिक कक्षमै झगडा भएको पाइएको छ’ महानगरीय प्रहरी वृत्त स्वयम्भूका डिएसपी निरन्जन भट्टले भने।
झगडाको मुख्य कारण खेलमा भएको विवाद नै रहेको पाइएको उनको भनाइ छ। उनीहरु टोले गुण्डा भएको पाइएको डिएसपी भट्टले बताए।
घटनामा संलग्न भएको आरोपमा वृत्तले २७ वर्षीय वीरेन्द्र धानुक र ३० वर्षीय सुलिप देवकोटालाई पक्राउ गरेको छ। उनीहरुविरुद्ध ज्यान मार्ने उद्योगमा म्याद थप गरेर अनुसन्धान अघि बढाइएको डिएसपी भट्टले बताए। त्यस्तै शनिबार पनि एक जना पक्राउ परेका छन्। उनको संलग्नता रहे/नरहेको बुझ्ने काम भइरहेकाले नाम भन्न नमिल्ने डिएसपी भट्टले बताए।
उक्त कुटपिटमा संलग्न भएको आरोपमा अमित महरसहित ८ जना फरार रहेका छन्। उनीहरु प्रहरीको खोजीसूचीमा छन्। अमित सत्तारुढ नेकपाको भातृसंगठन अनेरास्ववियूका संयोजक ऐन महरका भाइ हुन्।
तस्बिर : हिमाल खबरले अपलोड गरेको सिसिटिभी फुटेज भिडियोको स्क्रिनसट
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
