काठमाडौं-रौतहटको माधवनारायण नगरपालिका-२ खेसरहिया टोलस्थित हनुमान मन्दिरका पुजारी श्रीराम साहको हत्या भएको दुई साता बित्दा पनि अहिलेसम्म हत्यारा पत्ता लाग्न सकेका छैनन्।
६५ वर्षीय साहको भदौ ३ गते राति करिब ९ बजे हुनमान मन्दिर परिसरमै गोली हानी हत्या गरिएको थियो। कन्चनटमा गोली हानेर हत्या भएपछि जिल्ला प्रहरी कार्यालय रौतहटको टोलीले घटनाको सुरुवाती अनुसन्धान गरेको थियो।
घटनास्थलमा तालिम प्राप्त कुकुरसमेत परिचालन गरेर अनुन्धान गरेपनि हत्यारा पत्ता लाग्न सकेका थिएनन्। त्यसपछि प्रदेश २ प्रहरी कार्यालयले एसएसपी यज्ञविनोद पोखरेललाई अनुसन्धानमा खटाएको थियो। घटना भएको स्थान वरपर त्यस समयमा चालू अवस्थामा रहेका मोबाइलदेखि आपराधिक पृष्ठभूमिका व्यक्तिको समेत निगरानी गरे पनि अहिलेसम्म हत्यारा पक्राउ गर्न नसकिएको प्रदेश २ का डिआइजी धिरजप्रताप सिंहले जानकारी दिए।
तर केही दिनअघि भने प्रहरीले हत्यामा संलग्न भएको आरोपमा दुई जनालाई पक्राउ गरेको भन्दै समाचारहरु सार्वजनिक भएका थिए।यसबारे सोधपुछ गर्दा डिआइजी सिंहले भने, ‘अपराधी पक्राउ पर्दा प्रहरीले लुकाउनु पर्ने कारण छैन। झन् यो राष्ट्रियस्तरमै चर्चा भएको इस्युमा अपराधी पक्राउ गर्दा प्रहरीले स्याबासी पाउँछन्। यो अवस्थामा अपराधी लुकाउनु कुरै रहँदैन ।’
हत्यारा पक्राउ गर्न रौतहट प्रहरी, प्रदेश २ को प्रहरी टोली, केन्द्रीय अनुसन्धान ब्यूरो (सिआइबी) को टोली र प्रहरी प्रधान कार्यालयको टोलीसमेत परिचालित छन्। पुजारीको हत्यापछि हत्यारा सीमा पार गरेर भारत छिरेको हुनसक्ने प्रहरीले आशंका गरेको छ। हत्या भएपछि माधवनारायण नगरपालिका-१ वडाध्यक्ष शेख नरुल्लाहसमेत सम्पर्कविहीन भएका छन्। हत्यामा उनको समेत संलग्नता हुनसक्ने भन्दै प्रहरीले त्यसतर्फ पनि अनुसन्धान अघि बढाएको छ ।
हत्यामा धार्मिक रंग मिसिएको हुनसक्ने आशंकासहित केही समयअघि गृह मन्त्रालयले पुजारी हत्याको विरोध गर्नेलाई कारबाही गर्न भन्दै प्रहरी प्रधान कार्यालयलाई पत्रसमेत पठाएको थियो। अहिलेसम्म हत्यारा पत्ता नलागेको भन्दै मंगलबार काठमाडौं राष्ट्रिय प्रजातान्त्रिक विद्यार्थी संगठनले प्रदर्शनसमेत गरेको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
