झापा- प्रतिबन्धित चौपाया काटेको आरोपमा दुई युवालाई पक्राउ गरेको विरोधमा प्रहरीमाथि आक्रमण भएपछि दोहोरो झडपमा परी एक जनाको मृत्यु भएको छ।
झापा गाउँपालिका-३ का ३८ वर्षीय रसिकुल आलमको विर्तामोडस्थित बि एन्ड सी अस्पतालमा उपचारका क्रममा मृत्यु भएको प्रहरीले जानकारी दिएको छ।
झापा गाउँपालिका कामाटोलीमा प्रहरीमाथि आक्रमण भएपछि दोहोरो झडप भएको थियो। यस क्रममा प्रहरीले १० राउन्ड हवाइ फायर समेत खोलेको थियो।
करिब २५० जनाको समूहमा आएका व्यक्तिहरूले प्रहरीमाथि अन्धाधुन्ध आक्रमण गरी दुई प्रहरी घाइते बनाएपछि जवाफी हवाई फायर गरेको प्रहरीको भनाइ छ। प्रहरीले हवाइ फायर गरेपछि आक्रमणकारीहरू तितरबितर भएका थिए।
झडपमा परी दुई जना प्रहरीसमेत घाइतेका छन्। झडपमा नेपाल प्रहरीका प्रहरी निरीक्षक र सशस्त्र प्रहरीका जवान घाइते भएका हुन्। घाइते प्रहरीको उपचारका लागि अस्पताल पठाइएको छ। आक्रमणकारीतर्फ के कति क्षति भयो भन्ने विवरण प्राप्त हुन बाँकी छ।
प्रतिबन्धित चौपायाको मासु बिक्री गर्ने दुई जनालाई विर्तामोड ल्याउँदै गर्दा बुधबार साँझ साढे ६ बजे प्रहरीमाथि आक्रमण भएको थियो। आक्रमणकारीले प्रहरीको गाडीसमेत तोडफोड गरेको प्रहरीले जनाएको छ।
प्रहरीमाथि आक्रमण भएको स्थल।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
