सांकेतिक तस्बिर
सल्यान- सल्यानकाे वागचौर नगरपालिका१२ बाफुखोलामा आएको अविरल वर्षाले ओखरेनी गाउँका २५ घरपरिवार विस्थापित भएका छन्। ओखरेनी गाउँमा पहिराको उच्च जोखिममा परेपछि स्थानीयवासी विस्थापित भएर देउपुरीमा रहेको दुर्गा सरस्वती माविमा आश्रय लिइरहेका छन्।
ओखरेनी गाउँमा तीन घर पहिराेले बगाएको र गाउँभरिमा दर्जनाैं स्थानमा पहिरो गएकाले स्थानीयवासी घर छाडेर विद्यालयमा बसेका छन्। यही भदौ ३ गते आएको वर्षाले गाउँमा पहिरो गएको हाे।
अहिले पनि घरभित्रबाटै पानीको मूल फुटेको, घर भासिएको तथा घर वरिपरि पहिरो गएर पुरिने अवस्था भएकाले गाउँले विद्यालयमा बसेको स्थानीयवासी वीरसिंह डाँगीले जानकारी दिए। 'यस ठाउँमा सय वर्ष पहिले यस्तै खालको पहिरो गएको हो भन्ने सुनेका थियाैं , आज आफ्नै आँखाले यस्तो बिजोग देख्नुपर्यो', उनले भने।
पहिराेले विस्थापित भएको यतिका दिन बित्दा पनि राहत नपाएको उनीहरुको गुनासो छ। 'विस्थापित भएर आएकाहरुसँग न त खाने कुरा छ, न लत्ताकपडा नै ल्याउन पाएका छन्। यस्तो अवस्थामा हामी कसरी बस्नू, अहिलेसम्म कतैबाट केही राहत पाएका छैनौं', स्थानीयवासी पदम खत्रीले भने।
वाफुखोलाको ओखरेनीमा पहिराले ठूलो क्षति भएकाले तथ्याङ्क सङ्कलन गर्ने कार्य भइरहेको बागचौर नगरपालिका१२ का वडाध्यक्ष दीपककुमार वलीले बताए। 'अहिले वडा कार्यालयमार्फत मुचुल्का तयार गर्ने काम भइरहेको छ र राहतका लागि पहल गरिनेछ', उनल भने। बाफुखोलामा रहेका करिब ५५० घरधुरीमध्ये अहिले ५० प्रतिशतभन्दा बढी पहिराको उच्च जोखिममा छन् ।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
