त्रिशूली-नुवाकोटको दुप्चेश्वर गाउँपालिका-१ घ्याङफेदीको नेगीगाँउमा बस्तीमाथिको ठूलो ढुंगाले ३५ परिवार जोखिममा परेको छ। गाउँपालिकाका अध्यक्ष योविन्द्रसिंह तामाङका अनुसार पाँच वर्षअघि गएको विनाशकारी भूकम्पको समयमा डगमगाएको ढुंगा अहिलेको बर्सातले बग्न थालेपछि नेगीगाउँ जोखिममा परेको हो।
बस्तीभन्दा माथि पर्ने डाँडामा रहेको दुईतले घरभन्दा ठूलो आकारको ढुंगाले आफ्नो सतह छाडेर बग्न थालेपछि गाउँपालिकास्तरीय विपद् व्यावस्थापन समितिले ढुंगा हटाउन जिल्ला विपद् व्यवस्थापन समितिलाई अनुरोध गरेको छ।
‘ढुंगाको आकार निकै ठूलो भएकाले विस्फोट गराई हटाउनुपर्ने र त्यसका लागि नेपाली सेनामार्फत् तत्कालै हटाउन आवश्यक रहेको’ भनी जिल्ला विपद् व्यवस्थापन समितिलाई पत्राचार गरिएको गाउँपालिका अध्यक्ष तामाङले जानकारी दिए।
पाँच वर्षअघि गएको विनाशकारी भूकम्पको कम्पनले माथिबाट ढुंगा र सुक्खा पहिरो जानसक्ने भन्दै राष्ट्रिय पुनर्निर्माण प्राधिकरणको प्राविधिक अध्ययन टोलीले तयार गरेको प्रतिवेदनमा समेत नेगीगाँउलाई जोखिम बस्तीका रूपमा समावेश गरेको थियो। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769347165.png)
-1764146706.png)
