काठमाडौं-सर्वोच्च अदातलले कपनस्थित पुष्पा अधिकारीले सञ्चालन गरेको बालगृहबाट उद्धार गरिएका बालबालिकालाई कहाँ राख्ने भन्ने विषयमा अध्ययन गरि प्रतिवेदन पेश गर्न सर्वोच्च अदालतका रजिस्ट्रारलाई आदेश दिएको छ।
सर्वोच्चका रजिस्ट्रार केन्द्रीय बाल न्याय समितिका सदस्यसचिव हुने भएकाले उनलाई जिम्मा दिइएको हो। ‘११ जना बालबालिकाको सर्वोत्तम हित के–कसो गरि हुन्छ अध्ययन गरि १५ दिनभित्र प्रतिवेदन पेश गर्नु’, सर्वोच्चको आदेशमा भनिएको छ, ‘बालबालिका रहेको संस्थाका पदाधिकारीसँग छलफल गरि बाल मनोविज्ञानमा आधारित भई सुझाव दिनु।’
अधिकारीले सर्वोच्चमा हालेको बन्दीप्रत्यक्षीकरणको निवेदनमा सुनुवाइ गर्दै न्यायाधीशद्वय ईश्वर खतिवडा र तेजवहादुर केसीको इजलाशले प्रतिवेदन पेश गर्न आदेश गरेको हो।
न्यायाधीशहरुले बालवालिकासँग भिडियो कन्फ्रेन्समार्फत् कुराकानी गरेका थिए। बालवालिकालाई कहाँ बस्दा खुसी लाग्छ भनि इजलाशले प्रश्न गरेको थियो। न्यायाधीशहरुको प्रश्नमा उनीहरुले आफूहरु घरमै फर्कन चाहेको बताएका थिए। अभिभावकसँगै बस्ने र कुनै पनि बालगृहमा नबस्ने बताएपछि इजलाशले यस्तो आदेश गरेको हो।
बालबालिकाले पहिले बसेको बालगृह र अहिले राखिएको कुनै पनि ठाउँमा असुविधा नभएको तर बस्ने रुचि भने नभएको बताएका थिए। कपनस्थित केयर बालगृहबाट ११ जना बालबालिकाको साउन २१ गते उद्धार गरिएको थियो।
राष्ट्रिय बाल अधिकार परिषद् र महिला तथा बालबालिका खोजतलास केन्द्रको संयुक्त टोलीले उनीहरुको उद्धार गरेको थियो।
साउन १३ गते एक नवजात शिशुलाई फेला परेको भन्दै बालगृहमा राखिएको थियो। आमा भएकी बालिकालाई बेवारिसे भन्दै नाटकीय ढंगबाट बालगृहमा राखिएको प्रहरीको अनुसन्धानमा पाइएको थियो।
पुष्पा र शिशुकी आमाले पैसाका लागि यस्तो गरेको भन्दै ब्यापक विरोध भएको थियो। पुष्पाले सञ्चालन गरेको कोसेली बालगृहमा रहेका अन्य बालबालिका पनि जोखिममा रहेको भन्दै उजुरी परेपछि प्रहरी, परिषद्, केन्द्र र स्थानीयको सहयोगमा उद्धार गरिएको थियो ।
बाल गृहकी सञ्चालिका पुष्पाले महिलाको इज्जतका लागि बच्चालाई बेवारिसे भन्दै संरक्षणको जिम्मा लिएको बताउँदै आएकी छन्।
देशविदेशबाट उक्त बेवारिसे बालिकाका लागि सहयोग जुट्न थालेको थियो। प्रहरीले यसरी शिशु फाल्ने महिलाको खोजी पनि सुरु गरेको थियो। ती महिला फेला परेपछि यो प्रकरणको रहस्य खुलासा भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769347165.png)
-1764146706.png)
