काठमाडौं-निजामति कर्मचारी (सिभिल) अस्पतालका स्वास्थ्यकर्मीलाई आफ्नो टोलमा क्वारेन्टाइनमा राखेको भन्दै काठमाडौं महानगरपालिका वडा नम्बर ३१ का बासिन्दाले शनिबार गरेको विरोधको यतिबेला सर्वत्र आलोचना भइरहेको छ। तर वडाध्यक्ष नारायणप्रसाद भण्डारी वडावासीलाई विना जानकारी वस्तीको बीचमा रहेको होस्टलमा स्वास्थ्यकर्मीलाई राख्दा विरोध हुनु सामान्य भएको बताउँछन्।
‘वास्तवमा यो सामान्य कुरा हो। अस्पतालले हामी वडालाई मात्रै जानकारी दिएको भए हिजो त्यो अवस्था पनि आउने थिएन। टोलको ठूलो एरिया सबै बस्तीको माझमा छ। अनि त्यो ठाउँमा १०–१२ जना युवा भेला हुनु स्वाभाविक हो,’ वडाध्यक्ष भण्डारीले नेपाल लाईभसँग भने।
त्यहाँ स्वास्थ्यकर्मी राख्नै नदिने भन्दा पनि जानकारीविना राखिएकाले युवाहरु विरोधमा उत्रिएको हुन सक्ने उनको भनाइ छ। वडाध्यक्ष भण्डारी भन्छन्, ‘होस्टलवालाले बाहिरबाट जोसुकै मान्छे ल्याएर राखेको भए पनि सूचना माग्दा त पाउनुपर्छ भने अब यो विधिका मान्छे ल्याएर राखेपछि हामीले सूचना किन नपाउने भन्ने कुरा हो।’
वडावासी युवाहरुले होस्टलमा स्वास्थ्यकर्मी राख्नै नहुने भनेर विरोध नगरेको उनले जिकिर गरे। ‘यो सबै तिललाई पहाड बनाउने कुरा हो, स्वास्थ्यकर्मीलाई राख्नै हुन्न उनीहरुलाई बस्नै दिनुहुन्न भनेर युवाहरु विरोधमा उत्रिएजस्तो मलाई लागेको छैन। वडामा अहिलेसम्म यस्तो गतिविधि पनि भएको छैन। यो स्थिति कसरी आयो मलाई पनि पुरै जानकारी छैन,’उनले भने।
वडावासीले स्वास्थ्यकर्मीको अपमान नगरेको तथा होस्टलमा जोसुकै राख्दा पनि सुरक्षित ढंगले आफूहरुलाई जानकारी दिएर राख्नुपर्ने माग वडावासीको रहेको उनले बताए।
स्वास्थ्यकर्मी हुन् वा अन्य व्यक्ति, उनीहरुलाई सुरक्षित ढंगले राख्नुपर्यो, त्यहाँ गार्ड हुनुपर्यो, त्यहाँ गार्ड पनि थिएन। अहिले पछिचाहिँ गार्ड राखिएको छ,’ वडाध्यक्ष भण्डारी भन्छन्, ‘बिरामी या अरु जोसुकै भएपनि सुरक्षित राख्नुपर्यो नि, टोलवासी सुरक्षित हुनु परेन?’
अस्पतालबाट समन्वय गराइदिनु भनेर लेखिएको चिठ्ठी प्राप्त गरिसकेकाले यस सम्बन्धमा समन्वयका लागि सम्बन्धित सरोकारवाला, अस्पताल तथा होस्टल सञ्चालकलाई वडामा बोलाइएको अध्यक्ष भण्डारीले बताए।
‘अस्पतालका आधिकारिक व्यक्ति, होस्टल सञ्चालक तथा सम्बन्धित सरोकारवालासँग छलफल गरेर समस्या सुल्झाउँछौँ’, अध्यक्ष भण्डारीले भने। अस्पतालले जिल्ला प्रशासन कार्यालय काठमाडौंको समन्वयमा मध्यबानेश्वर मिलनचोकमा रहेको एक होस्टलमा आफ्ना २५–३० जना स्वास्थ्यकर्मीलाई क्वारेन्टाइनमा राखेको जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।