काठमाडौं- आर्थिक प्रलोभनमा परी आफूलाई दिइएको जिम्मेवारी इमान्दारीताका साथ निर्वाह नगरेको भन्दै सिन्धुलीमा कार्यरत दुई प्रहरीलाई निलम्बन गरिएको छ। निलम्बन हुनेमा इलाका प्रहरी कार्यालय भिमानमा कार्यरत प्रहरी हवल्दार कमल बहादुर खड्का र प्रहरी चौकी ढुंग्रेबास सिन्धुलीमा कार्यरत प्रहरी जवान वीरबहादुर प्रसाद यादव छन्।
जिल्ला प्रहरी कार्यालय सिन्धुलीले उनीहरुलाई निलम्बन गरेको हो । बा ६ ख ५५६३ नम्बरको सवारी साधनसँग रकम लिएको भन्ने उजुरीको आधारमा अनुसन्धान गर्दा रकम लिएको भन्ने पुष्टि भएपछि थप छानबिनको लागि उनीहरुलाई निलम्बन गरीएको हो। जिल्ला प्रहरी कार्यालय सिन्धुलीका प्रहरी नायव उपरीक्षकको संयोजकत्वमा उनीहरूमाथि कारबाही गर्न छानबिन गर्न समिति गठन समेत गरिएको छ।
आफ्नो ड्युटीमा इमान्दारिता प्रर्दशन गर्ने प्रहरी कर्मचारीलाई पुरस्कृत गर्ने र गैरव्यवसायिक कार्यमा संलग्नलाई कारबाही गरी प्रहरी सेवालाई मर्यादित बनाउने कार्यलाई बागमती प्रदेश प्रहरीले विशेष अभियानको रुपमा संचालन गरीरहेको छ।
बागमती प्रदेश प्रहरी कार्यालय अन्तर्गतका कार्यालयहरुमा कार्यरत प्रहरी कर्मचारीहरुबाट नागरिक केन्द्रित, स्तरीय, प्रभावकारी र पारदर्शी सेवा प्रवाह गराउने उद्देश्यले प्रदेश प्रहरी प्रमुख डिआइजी बसन्तकुमार लामाबाट विषेश कार्ययोजना बनाई मातहत प्रहरी कर्मचारीहरुबाट सम्पादन भइरहेको कार्यलाई अनुगमन र मूल्यांकन गर्न सिनियर प्रहरी अधिकृतको कमाण्डमा टाक्स फोर्स गठन गरिएको छ।
सेवाग्राहीसँग आर्थिक प्रलोभनमा पर्ने एक जना प्रहरी निरीक्षकसहित १३ जना प्रहरी कर्मचारी निलम्बित भैसकेका छन् भने ड्युटीमा इमान्दारिता प्रर्दर्शन गर्ने २५ जना प्रहरी कर्मचारी पुरस्कृत भइसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
