काठमाडौं- गृहमन्त्री रामबहादुर थापाले कोभिड-१९ रोकथाम तथा नियन्त्रणका लागि सुरक्षाका उपाय पालन गर्न सर्वसाधारणलाई अपिल गरेका छन्।कोरोना रोकथाम तथा नियन्त्रणका लागि सरकारले लागू गरेको बन्दाबन्दीको सबै नियम पालना गर्न उनले अपिल गरेका हुन्।
सरकारले मात्रै कोरोना रोकथाम तथा नियन्त्रणका लागि काम गरेर नहुने भन्दै गृहमन्त्री थापाले सबै नागरिकले सचेतना अपनाउन आवश्यक रहेको बताएका हुन्। आइतबार न्यूज एजेन्सी नेपालसँग कुराकानी गर्दै गृहमन्त्री थापाले सरकार र नागरिक सबैले एकसाथ सचेत भई नियम पालना गरे संक्रमणलाई नियन्त्रण गर्न सकिने बताए।
‘कोरोनाको सन्दर्भमा नागरिकहरुले पनि बन्दाबन्दीका नियमलाई पालन गर्न हुन म अनुरोध गर्न चाहन्छु। किनभने सरकारले मात्रै गरेर कोरोनाको रोकथाम गर्न सकिन्न नागरिकहरुको सहभागिता र उनीहरुको सचेतताले मात्रै कोरोनाको संक्रमणलाई हामीले रोक्न सक्छौं,' उनले भने, 'म सबै आदरणीय दाजुभाई दिदीबहिनीहरूलाई कोरोनाको संक्रमणको अवस्थामा सुरक्षाका नियम पालना गरिदिनुहुन अनुरोध गर्दछु।’
कोरोना रोकथाम तथा नियन्त्रणका लागि लकडाउन लागू भएपनि फेरि संक्रमण बढिरहेको छ। सरकारले केही कडाई गरी नियन्त्रणको प्रयास गरिरहेको गृहमन्त्री थापाको भनाइ छ।
बन्दाबन्दी गरेर समस्याको हल नहुने भएकोले सबै क्षेत्रलाई क्रमशः मापदण्ड अपनाएर खोल्न दिने नीति लिइएको उनले उल्लेख गरे। लकडाउनका कारण आर्थिक समस्याहरु देखिन थालेपछि सरकारले कोरोना र आर्थिक संकटको अवस्थालाई तालमेल गरी अगाडि बढ्ने नीति लिएको उनको भनाइ छ।
‘कोरोना र आर्थिक संकट दुवैलाई हामीले समाधान गर्नुपर्ने भएको हुनाले यसमा तालमेल मिलाएर हामीले गरिराखेका छौ र स्वास्थ्यका मापदण्ड अपनाएर उद्योग व्यवसायहरु पनि हामीले सञ्चालन गर्नुपर्नेछ,' उनले थपे, 'अरु सुरक्षाका मापदण्ड अपनाएर बन्दाबन्दीलाई पनि निरन्तरता दिनुपर्ने छ। यी दुईवटै कुराहरुलाई हामीले अगाडि बढाइराखेका छौं।’
सरकारले देशभित्र प्रवेश गर्ने १० वटा नाका तोकेपनि अझैपनि लुकीछिपी आउने काम भइरोखको र त्यसको नियन्त्रणका लागि गृह मन्त्रालयले अधिकतम प्रयास गरेको दाबी गरे।
‘अब हामीले यो खुल्ला नाकाहरुलाई नियन्त्रण गर्नको निमित्त अहिले १२ सय भन्दा बढी बोर्डर आउटपोस्टहरु स्थापना गरिएको छ। त्यसले धेरै हदसम्म नियन्त्रण गरेको छ। त्यही पनि लुकीछिपी आउने केही मात्रामा भइपनि राखेको छ। यसलाई पूर्ण बन्द गर्ने हाम्रो प्रयास जारी छ। हिजोको जुन अवस्था थियो त्यो चाहिं अहिले छैन,’ उनले भने।
अहिले देशमा बाढीपहिरो र कोरोनाको संकट एकैपटक आएकाले यसको समाधानमा जटिलता पैदा भएको थापाले बताए। यस वर्ष मनसुन सुरु हुनभन्दा अगाडि नै विपद जोखिम न्यूनीकरण तथा व्यवस्थापन समितिको बैठक बसेर पूर्व तयारी गरेको समेत गृहमन्त्री थापाको भनाइ छ।
गृहमन्त्री थापाले प्रधानमन्त्री दैवी प्रकोप राहत कोष र गृह मन्त्रालयअन्तर्गत रहेको रकमबाट उद्धार र पुनर्स्थापनाका लागि रकम निकासा गरी काम भइरोखेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
