काठमाडाैं- काठमाडौं महानगरपालिका वडा नम्बर १४ मा कोरोना संक्रमितकाे संख्या ४० पुगेको छ। वडा अध्यक्ष शोभा सापकोटाका अनुसार शुक्रबारसम्म विभिन्न पसल तथा गृहणीलाई कोरोना परीक्षण गराउँदा संक्रमितको संख्या ४० पुगेको हो।
‘हाम्रो त पुरै समुदायमा कोरोना फैलियो,’ वडा अध्यक्ष सापकोटाले भनिन्, ‘तरकारी बजार र मुख्य नाका भएको कारण पनि संक्रमितको संख्या धेरै देखिएको हो।’ सापकोटाका अनुसार दुई महिनाअघि नवलपरासीबाट मोटरसाइकलमा आएका एक दम्पतीको कोरोना परीक्षण गराउँदा श्रीमतीमा कोरोना पोजेटिभ देखिएको थियो। साेही मोटरसाइकलमा आएका उनका श्रीमानलाई भने कोरोना देखिएको थिएन।
दुई महिनाअघि नै ती महिलाको सम्पर्कमा आएका व्यक्तिहरुकाे कन्ट्याक्ट ट्रेसिङ गर्दा कसैमा सङक्रमण देखिएकाे थिएन। लकडाउन खुलेसँगै काठमाडाैंका विभिन्न स्थानबाट आउने क्रम बाक्लियो। साउन ८ गते सर्लाहीबाट आएका दुई जना महिलामा कोरोना संक्रमण देखिएकाे थियाे। उनीहरुको परिवारमा कन्ट्याक्ट ट्रेसिङ गराउँदा पनि कोरोना संक्रमण देखिएकाे थिएन।
केही दिनयता किराना पसलमा मात्रै आउने गरेका गृहणीमा कोरोना परीक्षण गर्दा पोजेटिभ देखिएपछि कन्ट्याक्ट ट्रेसिङ गराउँदा अन्यमा पनि कोरोना संक्रमण देखिएको हो। वडा अध्यक्ष सापकोटा भारतबाट आउने गाडीका कर्मचारी कलंकी वरपर नै बस्ने र किराना पसल र होटलको सम्पर्कमा आउने हुँदा समुदायस्तरमा कोरोना फैलिएको बताउँछिन्।
‘मालबाहक गाडीहरु कलंकी नै आउने भए,’ सापकोटाले भनिन्, ‘उनीहरुमार्फत् कोरोना किराना पसलमा पुग्यो र त्यहाँबाट पसलमा आउने गृहणीमा संक्रमण हुन पुग्याे।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
