काठमाडौं– सरकारले चालु आर्थिक वर्ष २०७७/०७८ मा एक दर्जनभन्दा बढी विमानस्थल निर्माणका लागि आवश्यक जग्गा प्राप्तीका लागि साढे ४ अर्ब रुपैयाँभन्दा बढी खर्च गर्ने भएको छ।
नेपाल नागरिक उड्डयन प्राधिकरणले चालु आवको ४१ अर्ब ११ करोड रुपैयाँ बजेटमध्ये ४ अर्ब ५६ करोड ३३ लाख रुपैयाँ जग्गाको मुआब्जाका लागि छुटाएको छ। प्राधिकरणले चालु आवमा गौतमबुद्ध अन्तर्राष्ट्रिय विमानस्थलको लागि अधिग्रहण गरिएको जग्गाको मुआब्जा वितरण गर्न २ अर्ब १६ करोड ८३ लाख छुटाएको छ। सरकारले गौतमबुद्ध अन्तर्राष्ट्रिय विमानस्थल निर्माण स्थलको जग्गा प्राप्तीमा मात्रै २३ अर्ब रुपैयाँ खर्च गर्दै छ।
यसैगरी, प्राधिकरणले चालु आर्थिक वर्षमै निजगढ अन्तर्राष्ट्रिय विमानस्थलका लागि अधिग्रहण गरिएको जग्गाको मुआब्जा वितरण गर्न २० करोड रुपैयाँ छुटाएको छ। साथै प्राधिकरणले पोखरा अन्तर्राष्ट्रिय विमानस्थलका लागि अधिग्रहण गरिएको जग्गाको मुआब्जा वितरण गर्न पनि ७८ करोड रुपैयाँ विनियोजन गरेको छ।
यसैगरी, प्राधिकरणले चालु आर्थिक वर्षकै बजेटमार्फत त्रिभुवन अन्तर्राष्ट्रिय विमानस्थलका लागि अधिग्रहण गरिएको जग्गाको मुआब्जा वितरण गर्न ८० करोड रुपैयाँ विनियोजन गरेको छ। यसबाहेक प्राधिकरणले ताप्लेजुंग, चन्द्रगढी, विराटनगर, रामेछाप, सुर्खेत, नेपालगञ्ज, धनगढी, जुम्ला, राजविराज र डोटी विमानस्थल विस्तारको लागि आवश्यक जग्गा अधिग्रहण गर्न ६१ करोड विनियोजन गरेको छ।
यसैगरी, प्राधिकरणले चालु आर्थिक वर्षको बजेट मार्फत नै दाङको नारायणपुरमा नयाँ विमानस्थल निर्माणका लागि जग्गा अधिग्रहणका लागि ५० लाख रुपैयाँ विनियोजन गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
