सुर्खेत- कर्णाली प्रदेशमा भ्रष्टाचारसम्बन्धी उजुरीको दर बर्सेनी बढ्दो क्रममा रहेको पाइएको छ। अख्तियार दुरुपयोग अनुसन्धान आयोगको कार्यालय सुर्खेतले बन्दाबन्दीका कारण गत आर्थिक वर्ष संख्यात्मक रूपले घटेको देखिए पनि उजुरी आउने दर भने उच्च रहेको जनाएको छ।
कार्यालयका अनुसार आव २०७५/७६ मा ७८३ उजुरी परेका थिए। गत आव २०७६/७७ मा ६७९ उजुरी परे। गत आवमा सबैभन्दा बढी उजुरी सुर्खेत २३८ उजुरी परेका छन्। दैलेख १८६, जाजरकोट १४४, कालीकोट १०२, जुम्ला ८४, सल्यान ८०, रुकुमपश्चिम ७८, हुम्ला ६६, मुगु ५३ र डोल्पाबाट ४९ उजुरी परेका छन्। गत आवमा संघीय सरकारअन्तर्गतका मन्त्रालय तथा कार्यालयसँग सम्बन्धित ३१६ उजुरी परेका छन्।
त्यस्तै प्रदेश सरकार मातहतका मन्त्रालयसँग सम्बन्धित २१० तथा स्थानीय तहका ५५४ उजुरी परेका थिए। अदुअवाको सक्रियतासँगै नागरिकमा सचेतना वृद्धि भएकाले पनि उजुरी आउने क्रम बढेको कार्यालयले भनाइ छ। कार्यालयका सूचना अधिकारी मेघनाथ सापकोटाले विकास निर्माणमा नागरिकको चासो र सूचना प्रविधिको पहुँचका कारण पनि उजुरी आउने क्रम बढेको बताए।
कार्यालयबाट खटिएको टोलीले गत वर्षमात्रै सेवाग्राहीसँग घुस लिँदै गर्दा १४ जनालाई रंगेहात पक्राउ गर्यो। यस संख्या र बरामद रकम अघिल्लो वर्षको तुलनामा बढी हो। आव २०७५/७६ मा कर्णालीमा चार जना रंगेहात पक्राउ परेका थिए भने रु चार लाख ४७ हजार घुस रकम बरामद गरिएको थियो। गत आवमा घुस रकमसहित नियन्त्रणमा लिइएका १४ जनाबाट रु १३ लाख ४१ हजार १६ बरामद भएको थियो।
कार्यालयबाट अनुसन्धान गरिएका २२ वटा मुद्दा विशेष अदालतमा दायर गरिएको छ। ती मुद्दामा ७० जनाविरुद्ध रु एक करोड ४९ लाख ३५ हजार ६४ बिगो दाबी गरी मुद्दा दायर गरिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
