काठमाडौं- प्रहरी समायोजनसम्बन्धी समितिको बैठकले प्रहरी समायोजन प्रतिवेदन पास गरेको छ। प्रधानमन्त्री केपी शर्मा ओलीसमेत सहभागी भएको बुधबारको समिति बैठकमा गृह मन्त्रालयले पेस गरेको समायोजनसम्बन्धी प्रस्ताव स्वीकृत भएको हो।
प्रतिवेदनमा प्रदेशका प्रहरीको नेतृत्व तत्कालका लागि डिआइजीले गर्ने र महानगरीय प्रहरीको अवधारणा हटाउनेलगायतका विषय समावेश छन्। तर महानगरीय प्रहरीको नाम परिवर्तन भएपनि परिवर्तित निकाय पनि संघीय प्रहरी मातहत नै रहने व्यवस्था छ।
प्रहरी समायोजनका सम्बन्धमा अध्ययन गरी निष्कर्ष दिन प्रहरी समायोजन कार्यदल गठन भएको थियो। सो कार्यदलले मन्त्रालयमा बुझाएको प्रतिवेदन नै मन्त्रालयले समितिको बैठकमा पेस गरेको थियो।
बागमतीको आन्तरिक मामिला तथा कानुन मन्त्रालयले कार्यदलले बुझाएको प्रतिवेदनका सम्बन्धमा विरोध गर्दै आएको थियो। उसले महानगरीय प्रहरी पनि प्रदेश प्रहरी मातहत नै राख्नुपर्ने माग गर्दै आएको थियो। तर मन्त्रालयको सो माग सम्बोधन नगरी प्रतिवेदन पास भएको हो।
प्रतिवेदन पास भएसँगै प्रहरी समायोजनका प्रक्रिया अघि बढाउन बाटो खुलेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
