काठमाडौं– राष्ट्रिय ध्वजाबाहक नेपाल वायुसेवा निगमको पुँजी विस्तार गर्ने तयारी भएको छ। निगम सञ्चालक बोर्डले पुँजी विस्तारको निर्णय गर्दै संस्कृति, पर्यटन तथा नागरिक उड्डयन मन्त्रालयमा प्रस्ताव गरेको छ।
निगमको अधिकृत पुँजी ५० अर्ब रुपैयाँ पुर्याउने निर्णय बोर्डबाट भएको हो। बोर्डबाट भएको निर्णय पर्यटन मन्त्रालयमा पुगेको छ। अहिले निगमको अधिकृत पुँजी ३२ अर्ब मात्रै छ। अधिकृत पुँजी कम भएको भन्दै निगमले अधिकृत पुँजी बढाउने प्रस्तव गरेको हो।
अधिकृति पुँजी कम भएकै कारण निगममा समय समयमा नगद प्रभावमा समेत असर परिरहेको छ। ३२ अर्बको अधिकृत पुँजीलाई ५० अर्ब पुर्याउने निर्णय भएको निगमका एक सञ्चालकले नेपाल लाइभलाई बताए। ‘पुँजी विस्तारको प्रस्ताव मन्त्रालयमा आइपुगेको छ,’ मन्त्रालयका एक सहसचिवले भने, ‘निगमको पुँजी विस्तारको प्रस्ताव अब अर्थ मन्त्रालयको सहमतिमा मन्त्रिपरिषद्मा लैजाने हो।’
निगमले ५० अर्बको अधिकृत पुँजी पुर्याउने भने पनि एक पटकमा ५० अर्बको पुँजी विस्तार भने नहुने मन्त्रालयको भनाइ छ। ‘अहिलेको अधिकृत पुँजीबाट निगम सञ्चालनमा समस्या छ,’ मन्त्रालय स्रोतले भन्यो, ‘एक पटकमा ५० अर्बको अधिकृत पुँजी बनाउन नसके पनि निगमको अधिकृत पुँजी विस्तार हुन आवश्यक छ। केही भएपनि पुँजी विस्तार हुन्छ।’
निगमले थप लगानी गर्ने गरी व्यवसायी योजनासहित पुँजी विस्तार गर्न लागको निगम अध्यक्ष सुशिल घिमिरे बताउँछन्। अधिकृत पुँजी कम भएका कारण निगमले ऋणको भारसमेत सन्तुलन गर्न सकेको छैन। निगम सुधारका लागि सबैभन्दा पहिले अधिकृत पुँजी विस्तार आवश्यक रहेको उनको तर्क छ।
निगमको सम्पति अहिले ५० अर्बको हाराहारीमा छ भने ऋण मात्रै ४२ अर्ब पुगिसकेको छ। निगमसँग अहिले अन्तर्राष्ट्रिय उडानका लागि २ वटा ए३३० वाइडबडी विमान र २ वटै ए३२० न्यारोबडी जहाज छन्। यसैगरी आन्तरिक उडानमा भने अब ३ वटा टिवनअटर जहाज मात्रै रहने छन्। निगमले ६ वटा (दुई वटा एमए–६० र ४ वटा वाई–१३ ) विमान साउन १५ गतेबाट उडान नगर्ने घाेषणा गरिसकेको छ।
निगमले आन्तरिक उडानका लागि आवश्यक जहाज खरिद गर्न र अन्तर्राष्ट्रिय उडानका लागि पनि थप जहाज खरिदका लागि अधिकृत पुँजी विस्तार गर्नुपर्ने बताउँदै आएको छ। निगमको अधिकृत पुँजी विस्तारको विषय सुगतरत्न कंसारकार महाप्रबन्धक भएदेखि उठान हुँदै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
