प्रतीकात्मक तस्बिर
म्याग्दी- म्याग्दीको बेनी नगरपालिका–२ बगरफाँट म्याग्दी नदीको कटानबाट जोगाउन म्याग्दी नदीको किनारामा लगाइएको ग्याबिन पर्खाल बाढीले बगाएपछि बगरफाँट गाउँ पुनःजोखिममा परेको छ। बिहीबार राति म्याग्दी नदीमा आएको बाढीले बस्ती संरक्षणका लागि नदी किनारामा लगाएका ४७० थान जालीमध्ये ३८ थान जाली बाढीले बगाएको छ।
नदी नियन्त्रणका लागि लगाएको पर्खालनै बगेपछि नदीको प्रवाह बस्तीतिर सोझिएको र बगरफाँटका खहरेखोला, पुल क्षेत्र, पलाँसेलगायतका क्षेत्र उच्च जोखिममा परेको म्याग्दी खोला नदी नियन्त्रण योजना उपभोक्ता समितिका अध्यक्ष नारायणबहादुर कार्कीले जानकारी दिए। बाढीले गाउँ जोखिममा पर्नुका साथै ३८ थान जाली बगाउँदा चार लाख ५० हजारभन्दा बढी क्षति भएको अध्यक्ष कार्कीले जानकारी दिए।
गत साल रुपाताल संरक्षण एकीकृत विकास परियोजना कास्कीको रु ५० लाखको लागतमा बगरफाँटको दूधेखोलादेखि बाङ्गेघरासम्म करिब दुई किलोमिटर क्षेत्रमा ग्याबिन जाली भरेर तटबन्ध गर्ने योजनाअनुसार रातोढुङ्गादेखि झोलुङ्गे पुलसम्म ४७० थान ग्याबिन जाली भरेर पर्खाल लगाइएको थियो।
अध्यक्ष कार्कीका अनुसार गत आर्थिक वर्षमा नदी कटानबाट अति प्रभावित क्षेत्र जरुवादेखि डम्मराको पुलसम्म ४७० थान जाली भरिएकोमा गत वर्ष पनि बाढीले १०० थानभन्दा बढी जाली बगाएर क्षति पुर्याएको थियो। विसं २०५७ मा म्याग्दी नदीमा आएको बाढी र त्यसपछि निरन्तररुपमा म्याग्दी नदीको कटानका कारण गाउँ नै जोखिममा परेपछि विगतका वर्षहरुमा सामान्य ग्याबिन जालीको प्रयोग गरी नियन्त्रणको प्रयास गरिएको भए पनि त्यो प्रभावकारी भएको थिएन।
करिब २०० घरधुरीको बसोबास रहेको बगरफाँट गाउँ हिउँदमा खतरामुक्त रहे पनि बर्खामा भने नदी कटानका कारण सधैँ जोखिममा रहने गरेको स्थानीयले बताएका छन्। अध्यक्ष कार्कीका अनुसार म्याग्दी नदीको धार परिवर्तन नहुने गरी बेनी नगरपालिका–६ डम्मराका बासिन्दाको आपसी सहमतिमा म्याग्दी नदीको करिब पाँच मिटर क्षेत्रबाट स्काभेटरको प्रयोग गरी नदीजन्यवस्तु (ढुङ्गा, गेगर, बालुवा) आदि निकालेर बगरफाँट क्षेत्रमा स्थानान्तरण गरिएको थियो।
नदीले बगरफाँटको करिब १५० रोपनी क्षेत्रफलको जग्गा कटान गरेर बगाइसकेको छ भने खहरेखोला, हरिहर शिवमन्दिर क्षेत्र, पलासे र जरुवा उच्च जोखिममा परेका छन्। नदी कटानका कारण वर्षेनी त्रासमा रहने बगरफाँटवासीलाई तटबन्धले केही राहत मिलेको र गाउँको संरक्षणका लागि सम्बन्धित निकायले ध्यान दिनुपर्ने स्थानीयवासी जीतबहादुर कार्कीले बताए। बगरफाँट सदरमुकाम बेनीबजारसँगै जोडिएको कृषिका लागि उर्बर फाँट भएको गाउँ हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
