काठमाडौं- शिक्षा मन्त्रालयले अनलाइन प्रणालीबाटै वैदेशिक अध्ययन अनुमति पत्र (नो अब्जेक्सन सर्टिफिकेट-एनओसी) जारी गर्ने भएको छ। बुधबार भएको एक कार्यक्रममा बीच अनलाइन प्रणालीबाट एनओसी जारी गर्ने कार्य शिक्षा विज्ञान तथा प्रविधिमन्त्री गिरिराजमणि पोखरेलले गरेका हुन्।
अब नो अबजेक्सन लेटर लिन चाहने आवेदक विद्यार्थीहरुले वैदेशिक अध्ययन अनुमति शाखा, केशरमहलमा भौतिक रूपमा उपस्थित नभई पनि वेबसाइटमार्फत् अनलाइन आवेदन गर्न सकिने मन्त्रालयले जानकारी दिएको छ।
आवेदन पत्र स्वीकृत भए-नभएको जानकारी समेत मन्त्रालयले नै गराइने व्यवस्था गरिएको बताइएको छ। जानकारी प्राप्त भएपछि निवेदकले तोकिए बमोजिमको बैंकमा राजस्व दस्तुर जम्मा गरे पश्चात नो अवजेक्सन लेटर लिन आउने मिति ईमेलमार्फत जानकारी गराइने मन्त्रालयले जनाएको छ। यसपछि वैदेशिक अध्ययन अनुमति शाखा केशरमहलमा पुगेर एनओसी संकलन गर्न सकिने मन्त्रालयले जनाएको छ।
अनलाइन प्रणालीबाट सेवा प्रवाहमा सहज हुने मन्त्रालयको विश्वास छ। विदेशी विश्वविद्यालय, कलेज वा शैक्षिक संस्थाहरुमा शुल्क पठाउने कार्यमा सहयोग पुर्याउँदै आएका नेपाल स्थित विभिन्न बैंकहरुलाई एनओसी पहिचान गर्न सहज हुने र अध्यागमन कार्यालयलाई वास्तविक विद्यार्थीको सत्यापन गर्न यस प्रणालीले सहयोग गर्ने मन्त्रालयले अपेक्षा गरेको छ।
कोरोना भाइरस संक्रमण थप फैलन नदिन गरिएको लकडाउनका कारण रोकिएको एनओसी जारी गर्ने प्रक्रिया पनि योसँगै सुरु भएको मन्त्रालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
