काठमाडौं- सत्तारुढ दल नेकपाभित्रको विवादकाे टुंगाे लगाउन पार्टी अध्यक्ष तथा प्रधानमन्त्री केपी ओली र अर्का अध्यक्ष पुष्पकमल दाहाल‘प्रचण्ड’बीच भएको 'वान टू वान' संवाद बिना निष्कर्ष टुंगिएको छ। अध्यक्षद्वयबीचको संवादबाट कुनै निर्णय हुन नसकेपछि बिहीबार वरिष्ठ नेता माधवकुमार नेपाललाई समेत राखेर छलफल गरिने भएको छ।
ओली-प्रचण्डबीच ६ पटक 'वान टू वान' संवाद भए पनि कुनै सहमति हुन नसकेपछि वरिष्ठ नेता नेपाललाई समेत संवादमा राखेर छलफल अघि बढाउन लागिएको नेकपाका एक नेताले बताए।
अध्यक्ष प्रचण्डले सरकार आलोचित भएकाले पार्टी अध्यक्ष एवं प्रधानमन्त्री दुवै पदबाट ओलीले राजीनामा दिनुपर्ने अडान राखेका छन्। यदि त्यसो हुन नसके पार्टी अध्यक्ष वा प्रधानमन्त्रीमध्ये एक पदबाट राजीनामा दिनुपर्ने बटमलाईन बनाएका छन्।
तर, वरिष्ठ नेता माधवकुमार नेपाल,झलनाथ खनाल,उपाधयक्ष वामदेव गौतमलगायत बहुमत सचिवालय सदस्यहरुले ओलीले दुवै पदबाट राजीनामा दिनुको विकल्प नरहेको बताउँदै आएका छन्। ओलीले पार्टी अध्यक्ष एवं प्रधानमन्त्री दुवै पदबाट कुनै हालतमा राजीनामा नदिने बताउँदै आएका छन्। यदि आफूलाई चेपुवामा पारेर दुवै पदबाट राजीनामा दिनुपर्ने अवस्था आए अप्रिय निर्णयसमेत लिन सक्ने जनाउसमेत प्रधानमन्त्री ओलीले दिइसकेका छन्।
प्रधानमन्त्री ओलीले वान टू वान संवादमा सरकारमा आफूलाई सघाइ पार्टीको सम्पूर्ण जिम्मेवारी लिन प्रचण्डलाई आग्रह गरिरहेका ेबुझिएको छ। प्रचण्डले पार्टीको जिम्मा लिए माधव नेपालको समेत सहमति लिएर मुख्यमन्त्री र मन्त्री हेरफेर गरेर भागबन्डा दिएर मिलाउने रणनीति ओलीले बनाएका छन्।
प्रधानमन्त्री वा पार्टी अध्यक्षमध्ये एक पदबाट ओलीले राजीनामा दिए मान्ने पक्षमा प्रचण्ड छन्। तर वरिष्ठ नेता नेपाल भने प्रधानमन्त्री र पार्टी अध्यक्ष दुवैबाट ओलीलाई राजीनामा गराउनुपर्ने पक्षमा छन्।
रोकिएको पार्टीको स्थायी कमिटी बैठक शुक्रबारदेखि सुरु हुने भएकाले बिहीबारै तीन नेताबीच कुनै सहमतिमा पुग्नेु पर्ने दबाब पार्टी नेतृत्वमा छ। पार्टीमा सहमति नभए फेरि स्थायी कमिटी बैठक स्थगित हुने देखिएको छ। बिहीबार अध्यक्ष ओली-प्रचण्ड र वरिष्ठ नेता नेपालबीच हुने त्रिपक्षीय छलफललाई महत्वका साथ हेरिने भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
