महालक्ष्मी नगरपालिका-५ टीकाथलीको दृश्य।
ललितपुर- नेपाली कांग्रेससहित ६ राजनीतिक दलका प्रतिनिधिले ललितपुरको महालक्ष्मी नगरपालिकामा आंशिक लकडाउन गराउन माग गरेका छन्। उनीहरुले नगरप्रमुख रामेश्वर श्रेष्ठलाई सोमबार बुझाएको ज्ञापनपत्रमा नगरपालिका क्षेत्रमा कोभिड-१९ का संक्रमितहरुको संख्या बढिरहेको भन्दै सबैको निःशुल्क पिसिआर परीक्षण गर्नसमेत माग गरेका छन्। महालक्ष्मी नगरपालिकामा दुई दर्जनभन्दा बढीलाई कोभिड-१९ को संक्रमण भेटिएको छ।
नेपाली कांग्रेस महालक्ष्मी नगर सभापति दिवाकर सिलवालको नेतृत्वमा गएको प्रतिनिधि मण्डलले कोरोना नियन्त्रणका लागि नगरपालिकाले गरेको प्रयासबारे प्रतिपक्षी दलहरु अनभिज्ञ रहेकोसमेत उल्लेख गरेको छ। नगरपालिकाले राजनीतिक दलका स्थानीय प्रतिनिधिसँग समन्वय नगरेको समेत उनीहरुको गुनासो छ। लुभु क्षेत्रमा कोरोना संक्रमित भेटिएपछि नगरपालिकाका वडा नम्बर ७, ८ र ९ मा आंशिक लकडाउन गरिएको छ।
'केही वडामा मात्रै आंशिक लकडाउन गरेर नगरबासीको स्वास्थ्य संरक्षण गर्न सम्भव छैन। त्यसकारण हामीले आंशिक लकडाउन, सबैको स्वास्थ्य परीक्षणको माग राखेका हौँ। पर्याप्त आइसोलेसन सेन्टर स्थापना होस् भन्ने पनि हाम्रो माग छ,' नगरपालिकासँग गरिएको मागबारेमा कांग्रेसका नगर सभापति सिलवालले भने।
नगरबासीको स्वास्थ्य संरक्षणका लागि नगरपालिका नेतृत्वसँग सहकार्य गर्न तयार रहेको पनि ६ दलले उल्लेख गरेका छन्। ज्ञापनपत्र दिनेहरुमा कांग्रेस सभापति सिलवाल, राप्रपा नेता नरेश कार्की, नेकपा क्रान्तिकारी माओवादीका अर्जुनलाल श्रेष्ठ, नेकपा मालेका चन्दा श्रेष्ठ, जनता समाजबादी पार्टीका नेता रमेश पोखरेल तथा देशभक्त गणतान्त्रिक मोर्चाका मुकेश श्रेष्ठ छन्। उनीहरुले बाढी, डुबान तथा अव्यवस्थित खुला ढल र फोहोर पानीका कारण पर्न सक्ने समस्याको समाधानका लागि पनि नगरपालिकाको ध्यानाकर्षण गराएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1738557849.jpg)
-1749826086.png)
