देशभर अविरल वर्षा, बाढी र पहिरोबाट दुई दिनमै २५ जनाको मृत्यु, ५६ बेपत्ता

समाज

देशभर अविरल वर्षा, बाढी र पहिरोबाट दुई दिनमै २५ जनाको मृत्यु, ५६ बेपत्ता आइतबारसम्म अधिकांश क्षेत्रमा भारी वर्षा हुने प्रक्षेपण

वीरेन्द्र ओली शुक्रबार, असार २६, २०७७ २१:००

काठमाडौँ- अविरल वर्षाका कारण बाढी र पहिरोका कारण बिहीबार र शुक्रबार मात्रै २५ जनाको मृत्यु हुनुका साथै ५६ जना बेपत्ता भएका छन्। मनुसनी भारी वर्षाका कारण अर्बौंको क्षति भएको गृह मन्त्रालयले जनाएको छ।

बिहीबार सिन्धुपाल्चोकको बाह्रबिसे र भोटेकोशी गाउँपालिकामा पर्ने बुलकुटे खोलामा आएको बाढीबाट २ जनाको मृत्यु हुनुका साथै २० जना बेपत्ता भएको गृह मन्त्रायका प्रवक्ता दीपेन्द्रनाथ शर्माले बताए। बिहीबारै सिन्धुपाल्चोक र डोटीमा गरी ८ जना घाइते भएका छन्। यस्तै शुक्रबार बाढी तथा पहिरोबाटै २३ जनाको मृत्यु हुनका साथै ३६ जना बेपत्ता र २६ जना घाइते भएको गृह मन्त्रालयले जनाएको छ। शुक्रबार बाढी र पहिरोबाट कास्की, लमजुङ, म्याग्दी, रुकुम पश्चिम, तनहुँ, जाजारकोट, दोलखा र गल्मी गरी ८ जिल्ला सबैभन्दा बढी प्रभावित भएका छन्।

दुई दिनमा कहाँ कति मृत्यु र बेपत्ता भए
बाढी पहिरोबाट सबैभन्दा धेरै पहाडी जिल्ला प्रभावित भएका छन्। कुन जिल्लामा कति मृत्यु र बेपत्ता भए भन्ने विषयमा तल देखाइएको छ।

क्र.स.	जिल्ला	मृत्यु	बेपत्ता
१	म्याग्दी	३	३१
२	लमजुङ	३	-
३	कास्की	७	-
४	रुकुम पश्चिम	२	-
५	जाजरकोट	७	५
६	गुल्मी	१	-
७	सिन्धुपाल्चोक	२	२०
	जम्मा	२५	५६

स्रोत : गृह मन्त्रालय

आइतबारसम्म देशका अधिकांश ठाउँमा भारी वर्षा हुने प्रक्षेपण
जल तथा मौसम विज्ञान विभाग पूर्वानुमान महाशाखाका अनुसार आइतबार रातीसम्म देशका अधिकांश क्षेत्रमा भारी वर्षा हुन सक्ने प्रक्षेपण गरेको छ। बिहीबारदेखि सुरु भएको मनसुनी वर्षाले देशका अधिकांश क्षेत्रमा जनधनको क्षति पुर्‍याएको छ।

बिहीबार बिहानैदेखि न्यूनचापीय रेखा पूर्वी र मध्य-तराई क्षेत्रमा केन्द्रित भएकाले मनसुनी वर्षा देशभर सक्रिय भएको जल तथा मौसम विज्ञान विभाग पूर्वानुमान महाशाखाका मौसमविद् मीनकुमार अर्यालले बताए। ‘बिहीबार बिहानैदेखि न्यूनचापीय रेखा नेपालको तराई क्षेत्रमा केन्द्रित भयो। पानी पार्ने न्यूनचापीय रेखा प्रदेश एक, प्रदेश दुई, बाग्मती, गण्डकी र प्रदेश ५ मा केन्द्रित भएकाले भारी वर्षा भइरहेको छ,’ अर्यालले भने, ‘आइतबार बेलुकादलेखि पूर्वी तराई हुँदै दक्षिणतिर न्यूनचापीय रेखा सर्दै जाने देखिएकाले सोमबारदेखि मौसममा हल्का सुधार आउन सक्छ।’ मनसुनको मध्य समय भएकाले मध्यमदेखि भारी वर्षा भइरहेकाले सचेत रहन सबैलाई अर्यालले आग्रह गरेका छन्।

शुक्रबार राती देशभर सामान्यदेखि पूर्ण बदली हुने र सातै प्रदेशका अधिकांश स्थानमा मेघगर्जनसहित हल्का र मध्यम वर्षा हुन सक्ने महाशाखाको प्रक्षेपण छ। महाशाखाका अनुसार प्रदेश १, प्रदेश २, बागमती र गण्डकी र प्रदेश ५, सुदुरपश्चिम र कर्णाली प्रदेशका अधिकांश स्थानमा भारी वर्षाको सम्भावना छ।

शुक्रबार कहाँ कति वर्षा?
महाशाखाको शुक्रबार बेलुका ६ बजेको विवरणअनुसार सबैभन्दा बढी वर्षा पोखरामा २ सय ५५ दशमलव ९ मिलिमिटर वर्षा भएको छ। सिमरामा १ सय ३६ दशमलव ४ एमएम, भैरहवामा १ सय ३५ दशमलव ३ एमएम, कास्कीको लुम्लेमा ७४ दशमलव ३ एमएम, दोलखाको जिरीमा ८३ एमएम, नेपालगञ्जमा ७४ एमएम, धरान ५० दशमलव ५ एमएम वर्षा भएको छ। तर, काठमाडौ उपत्यकामा २८ दशमलव ४ एमएम वर्षा भएको महाशाखाले जनाएको छ।

यस्तो हुनेछ शनिबार र आइतबारको मौसम
शनिबार देशभर सामान्यदेखि पूर्ण बदली भई सातै प्रदेशका धेरैजसो स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ। प्रदेश १, बागमती र गण्डकीका धेरै स्थानमा र प्रदेश २, प्रदेश ५, सुदुरपश्चिम प्रदेश र कर्णाली प्रदेशको एक/दुई स्थानमा भारी वर्षाको सम्भावना छ। यस्तै शनिबार रातीः देशभर सामान्यदेखि पूर्ण बदली रही सातै प्रदेशका धेरैजसो स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ। महाशाखाका अनुसार प्रदेश १ र प्रदेश २ का थोरै स्थानमा साथै बागमती प्रदेश, गण्डकी प्रदेश र सुदुर पश्चिम प्रदेश, प्रदेश ५ र कर्णाली प्रदेशको एक दुई स्थानमा भारी वर्षा हुने सम्भावना छ।

आइतबार देशभर सामान्यदेखि पूर्ण बदली रही धेरै जसो स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना छ। प्रदेश १, बागमती प्रदेश र गण्डकी प्रदेशका थोरै स्थान तथा प्रदेश २, प्रदेश ५ का एक दुई स्थानहरुमा भारी वर्षा सम्भावना रहेको महाशाखाले जनाएको छ। यस्तै राती देशभर सामान्यदेखि पूर्ण बदली रही धेरैजसो स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ। प्रदेश १, बागमती प्रदेश र गण्डकी प्रदेशका थोरै स्थानमा तथा प्रदेश २ का एक/दुई स्थानमा भारी वर्षा हुने सम्भावना रहेको महाशाखाको प्रक्षेपण छ।

कहाँ-कहाँ बाढीको सम्भावना छ?
शनिबार कोशी र नारायणी नदीसँगै अन्य सहायक नदीमा पानीको बहाव उल्लेख्य बढ्नुका साथै सर्तकता आसपाससम्म पुग्न सक्ने अनुमान गरिएको छ। तर कर्णाली, महाकाली र सहायक नदीमा बहाव बढेपनि सर्तकर्ता भन्दा तलै हुनेछ। यस्तै कन्काई, कमला, बागमती, पश्चिम राप्तीलगायत नदीमा बहाव बढ्न सक्नेछ। प्रदेश १, प्रदेश २, बाग्मती, प्रदेश ५ र सुदुरपश्चिम प्रदेशका मध्य पहाडीका चुरे र तराई क्षेत्र भई बग्ने नदीमा पानी बहाव बढ्न गई सतर्कता तहसम्म पुग्न सक्नेछ।

यस्तै आइतबार कोशी, नारायणी र यसका सहायक नदीमा पानीको बहाव उल्लेख्य बढ्नुका साथै खतराको तह आसपास पुग्ने बाढी पूर्वानुमान महाशाखाको भनाइ छ। तर, कर्णाली, महाकाली र यसका सहायक नदीमा पानीको बहाव बढेपनि खतराको तहभन्दा तलै हुने अनुमान छ। आइतबार कन्काई, कमला, बबई, पश्चिम राप्ती, तिनाउ र अन्य सहायक नदीमा पानीको बहाव उल्लेख्य बढ्न सक्ने अनुमान गरिएको छ। प्रदेश एक, दुई, बाग्मती प्रदेश र गण्डकी प्रदेशका मध्य तराई र चुरे क्षेत्र भई बग्ने नदी र खोलामा पानीको बहाव बढ्नुका साथै कतिपय नदीमा खतराको तहसम्म पुग्न सक्ने बताएको छ।

पछिल्ला प्राकृतिक प्रकोपबाट भएको मानवीय क्षति
साल            मृत्यु
०६८           ५१९
०६९           ३९९
०७०           ४१७
०७१           ५३९
०७२           ९,२७९
०७३           ४८३
०७४           ५९७
०७५ ४६५
०७६     ३७९
जम्मा          १३,०७७