काठमाडौं- राष्ट्रिय खेलकुद परिषद (राखेप)को सदस्य सचिवका लागि दर्खास्त आह्वान गरिएको छ। सदस्य सचिव सिफारिस समितिको शुक्रबार बसेको बैठकले दरखास्त आह्वान गरेको हो।
युवा तथा खेलकुद मन्त्रालयका सचिव रामप्रसाद थपलियाको संयोजक्तवमा रिमबहादुर रानाभाट र इन्दिरा निरौला सदस्य रहेको सिफारिस समितिले दरखास्त आह्वान गरेको हो। योग्यता पुग्नेले सात दिनभित्र दरखास्त हाल्न सक्नेछन्। जसमा संक्षीप्त कार्ययोजनासमेत पेश गर्नुपर्नेछ।
कार्ययोजनाको साथमा नेपाली नागरिकताको प्रतिलिपी, नेपाल सरकारबाट मान्यताप्राप्त विश्वविश्द्यालयबाट कम्तीमा स्नातक तह उतीर्ण प्रमाणपत्रको प्रतिलिपी र खेलकुद क्षेत्रमा कम्तिमा पाँचवर्ष काम गरेको अनुभवको प्रतिलिपी पनि पेश गर्नुपर्नेछ।
तोकिएको समयभित्र प्राप्त भएका कार्ययोजनाहरुलाई सिफारिस समितिले अध्ययन गर्ने र कुनै उमेदवारलाई सिफारिस समितिले थप स्पष्ट हुन चाहेमा बैठकमा बोलाई छलफल गर्न सक्ने कार्यविधिमा उल्लेख छ।
कार्ययोजना अध्ययन पश्चात समितिले कार्ययोजनाको आधारमा कम्तीमा एक महिलासहित तीनजनाको नाम बैठकबाट निर्णय गरी मन्त्रालयमा सिफारिस गर्ने छ।
अहिले नयाँ सदस्यसचिव नियुक्त नहुँदासम्म राखेपको कार्यवाहक सदस्य सचिवमा युवा तथा खेलकुद मन्त्रालयका खेलकुद महाशाखा प्रमुख भक्त बहादुर ढकालले जिम्मेवारी सम्हालिरहेका छन्।
अब सिफारिस समितिले स्नातक उत्तिर्ण भएको, खेलकुदको क्षेत्रमा कम्तिमा पाँच वर्ष काम गरेको, ३० वर्ष उमेर पूरा भएको योग्यता पुग्ने एक जना महिलासहित तीन जनाको नाम मन्त्रालयमा सिफारिस गर्नेछ।
मन्त्रालयले मन्त्रीपरिषदमा पेश गरेको त्यही नामबाट एक सदस्य सचिव हुनेछन्। त्यसरी मन्त्रालयको सिफारिसमा मन्त्रीपरिषदबाट नियुक्त भएका सदस्य सचिवको कार्यकाल चार वर्षको रहनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
