काठमाडौं– नेपाल क्रिकेट संघ (क्यान) को विशेष साधारणसभा बिहीबार काठमाडौंमा सुरु भएको छ।
सल्लाहकार समूहले सिफारिस गरेको विधान पारित गर्ने उद्देश्यका साथ विशेष साधारणसभा सुरु भएको हो। आइसिसीका प्रतिनिधि अमर शेखको उपस्थितिमा सुरु भएको साधारणसभा शुक्रबारसम्म चल्नेछ।
उद्घाटन सत्रमा बोल्दै खेलकुद मन्त्री जगतबहादुर सुनार विश्वकर्माले विशेष साधारणसभाले क्रिकेटको निकास निकाल्ने विश्वास व्यक्त गरे। 'नेपाली क्रिकेटमा रहेको अध्याँरोलाई हटाउन विशेष साधारणसभाले जिम्मेवारीपूर्ण निर्णय गर्ने विश्वास छ। सवैले आफ्ना स्वार्थ त्यागेर क्रिकेटको हितमा निर्णय गर्न आग्रह गर्छु,' मन्त्री विश्वकर्माले भने। क्यानका अध्यक्ष चतुरबाहदुर चन्दले नेपाली क्रिकेटलाई निकास दिन त्याग गर्न तयार रहेको बताए।
यसअघि आइसिसीले आफुले भनेअनुसार विधान पारित भएमा क्यानमाथि लागेको निलम्बन फुकुवा गर्ने संकेत दिएको थियो। विधान पारित भई क्यानको केन्द्रीय समितिको निर्वाचन भएमा आगामी जुलाईमा बस्ने आइसिसीको साधारणसभाको बैठकमा नेपालमाथि लागेको निलम्बन फुकुवा प्रस्ताव पेस हुनेछ।
साधारणसभापछि निर्वाचनका लागि ५ सदस्यीय मनिटरिङ समिति बन्नेछ। समितिमा ३ जना सदस्य आइसिसीका तर्फबाट हुनेछन् भने निर्वाचित क्यान र परिषद्का १–१ जना सदस्य रहनेछन्।
यसअघि निर्वाचन भइसकेका जिल्लालाई मान्यता दिने बताइएको छ। विवाद र उजुरी परेका जिल्लामा भने मोनिटरिङ समितिले छानबिन गर्नेछ। विवादित जिल्लामा समितिले मान्यता दिन वा फेरि निर्वाचन गर्न निर्देशन दिन सक्नेछ। त्यसपछि प्रदेश र केन्द्रीय समितिको निर्वाचन हुनेछ। केन्द्रीय समितिको निर्वाचनपछि आगामी जुलाईमा बस्ने आइसिसीको बैठकमा क्यानमाथि लगाएको निलम्बनको विषयमा प्रस्ताव पेश हुनेछ। निलम्बनको विषयमा आइसिसी बैठकमा प्रस्ताव लैजान जुलाई अगाडि क्यानको केन्द्रीय समितिको निर्वाचन हुनुपर्नेछ।
आन्तरिक विवाद र सरकारी हस्तक्षेप भएको भन्दै आइसिसीले क्यानलाई ०७३ बैशाखमा निलम्बन गरेको थियो। त्यसपछि आइसिसीले नै नेपाली क्रिकेटको व्यवस्थापन हेर्दै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
