चौतारा-मेलम्ची खानेपानी विकास समिति र खानेपानी मन्त्रालयले कुनै जानकारी नै नदिई एकतर्फी रुपमा पानी पथान्तरण सुरु गरेकोमा सिन्धुपाल्चोकका जनप्रतिनिधि, स्थानीय तह र सरोकारवाला निकायले आपत्ती जनाएका छन्।
सोमबार पत्रकार सम्मेलन गर्दै उनीहरुले सरोकारवालासँग कुनै समन्वय नै नगरी मन्त्रालयले यस्तो कार्य गरेको भन्दै दुःख प्रकट गरेका हुन्।
प्रमुख जिल्ला अधिकारी उमेशकुमार ढकालले आइतबार पानी परीक्षण उद्घाटन गरेका थिए। खानेपानी तथा सरसफाई मन्त्री बिना मगरले आइतबार आयोजित पत्रकार सम्मेलनमा पानी काठमाडौं ल्याउनुको श्रेय मन्त्रालय र खानेपानी विकास समितिलाई मात्र दिएको भन्दै उनीहरुले मन्त्रीको अभिव्यक्ति तत्काल सच्याउन माग गरेका छन्। आगामी दिनमा यसैगरी निर्णय गरे थप समस्या हुने चेतावनी पनि उनीहरुले दिएका छन्।
पत्रकार सम्मेलनमा जिल्ला समन्वय समितिका प्रमुख कृष्णगोपाल तामाङ, मेलम्ची नगरपालिकाका प्रमुख डम्बर अर्याल, राप्रपा २ नम्बर क्षेत्रीय अध्यक्ष फणिन्द्र दाहाल, हेल्मो सिन्धु सामाजिक उत्थान कार्यक्रमका अध्यक्ष उपेन्द्र तामाङ, ईन्द्रावती सरोकार समितिका अध्यक्ष विष्णुमणि आचार्यलगायतले लेबी र स्थानीयको माग पूरा नगरी पानी लगे आन्दोलन गर्ने चेतावनी दिए। लेबी, मजदुर, कर्मचारी र सप्लायर्सहरुको समस्या तथा विकास निर्माण सम्बन्धमा तत्काल निर्णय लिन पनि बैठकले ध्यानाकर्षण गरेको छ।
हेलम्बु गाउँपालिकाको घोर आपत्ति
मेलम्चीको पानी सुरुङबाट काठमाडौंमा पठाउनका लागि सरकारले स्थानीय सरकारसँग कुनै समन्वय र सहकार्य नगरेको भन्दै हेलम्बु गाउँपालिकाले पनि घोर आपत्ति जनाएको छ।
सोमबार एक विज्ञप्ति जारी गर्दै अध्यक्ष निमा ग्याल्जेन शेर्पाले उक्त कार्य अनुचित र गैरजिम्मेवार भएको टिप्पणी गरेका छन्। उनले आगामी दिनमा सहयोगका लागि असहज वातावरण सिर्जना गर्न स्थानीय सरकार र स्थानीयबासी बाध्य हुने तथा यसको सम्पूर्ण जिम्मेवारी उक्त आयोजना र सोसँग सम्बन्धित निकायले व्यहोर्नुपर्ने उल्लेख गरेका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।