काठमाडौं– आगामी भदौमा बंगलादेशमा हुने १२औं संस्करणको साफ सुजुकी कप (साफ च्याम्पियनसिप)* फुटबल प्रतियोगिताको समूह विभाजन गरिएको छ। ढाकामा बुधबार सार्वजनिक गरिएको समूह विभाजनमा नेपाल समूह 'ए' मा परेको छ। समूहमा नेपालसहित आयोजक बंगलादेश, पाकिस्तान र भुटान छन्।
समूह 'बी' मा सात पटकको च्याम्पियन भारत, माल्दिभ्स र श्रीलंका पारेका छन्।
प्रतियोगिता आगामी भदौ १९ गतेदेखि ३० गतेसम्म सञ्चालन हुनेछ। सबै खेल बंगबन्धु रंगशालामा हुनेछ। दुवै समूहका शीर्ष २ टिम सेमिफाइनलमा पुग्नेछन्।
साफ च्याम्पियनसिपका ११ संस्करण सकिँदा नेपालले अहिलेसम्म उपाधि जित्न सकेको छ। सन् १९९३ पाकिस्तानबाट सुरु भएको च्याम्पियनसिपमा नेपाल अहिलेसम्म फाइनलमा समेत पुग्न सकेको छैन।
नेपाल सन् १९१३ मा तेस्रो भएको थियो। १९९५ मा चौथो स्थानमा सीमित नेपालले १९९७ मा घरेलु भूमिमा आयोजना भएको प्रतियोगिताको समूह चरणबाटै बाहिरियो। सन् १९९९ मा नेपालले सेमिफाइनलको यात्रा तय गरेपनि माल्दिभ्ससँग पराजित भयो। त्यसपछि नेपाल ४ संस्करणसम्म समूह चरणबाटै बाहिरिएको थियो।
नेपाल २००३, २००५, २००८ र २००९ मा आयोजना भएको प्रतियोगितामा समूह चरणबाटै बाहिरियो। सन् २०११ मा सेमिफाइनलमा पुग्दा नेपाल १२ वर्षपछि सेमिफाइनलमा पुगेको थियो। तर २०११ मा पनि नेपाल सेमिफाइनलबाटै बाहिरियो। सन् २०१३ मा घरेलु भूमिमा आयोजना भएको प्रतियोगितामा पनि नेपाल सेमिफाइनलमा अफगानिस्तानसँग पराजित भयो। सन् २०१५ भारतमा आयोजना भएको प्रतियोगिता नेपाल समूह चरणबाटै बाहिरिएको थियो।
नेपालले साफ च्याम्पियनसिपका ११ संस्करणमा ३४ खेल खेल्दा ९ खेलमा जित निकालेको छ। ६ खेल बराबरी खेलेको नेपाल १९ खेलमा पराजित भएको छ।
साफ खेलेका ८ राष्ट्रमध्ये ५ राष्ट्रले उपाधि जित्दा नेपाल, पाकिस्तान र भुटानले अहिलेसम्म उपाधि जित्न सकेका छैनन्।
*सच्याइएको
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
