मुम्बई– आइपिएल क्रिकेटमा रोयल च्यालेन्जर्स बैंलोरका कप्तान विराट कोहली र मुम्बई इन्डियन्सका कप्तान रोहित शर्माले उत्कृष्ट ब्याटिङ गरेका छन्। मंगलबार राति एकआपस विरुद्ध मैदानमा उत्रिदा दुवैले ९० माथिको रन जोडेका हुन्।
पहिले ब्याटिङ गरेको मुम्बईले ६ विकेटको क्षतिमा २ सय १३ रन जोडे। मुम्बईका लागि कप्तान रोहितले २ बल बाँकी छदा आउट हुनुअघि ९४ रन जोडे। उनले ५२ बलमा १० चौका र ५ छक्का प्रहार गरे। इभिन लेभिसले पनि ६५ रन जोडेपछि मुम्बईले मजबुत स्कोर खडा गर्यो। त्यसअघि सुरुवाती २ बलमा २ विकेट गुमाएपनि रोहितको इनिङले मुम्बईलाई बलियो स्थितिमा पुर्याएको थियो। उमेश यादवले पहिलो २ बलमा सूर्यकुमार यादव र इशान किसनलाई आउट गरेका थिए।
२ सय १४ रनको लक्ष्य पछ्याएको बैंग्लोरका लागि कप्तान विराट कोहलीले नटआउट ९२ रन जोडेपनि जितका लागि पर्याप्त हुन सकेन। कोहलीबाहेक अन्य ब्याटसम्यान सस्तैमा आउट हुँदा बैंग्लोरले २० ओभरमा १ सय ६७ रन मात्र जोड्न सक्दा ४६ रनले पराजित भयो। कोहलीपछि दोस्रो बढी रन बनाएका क्वान्टन डेककले १९ रन जोडेका थिए। बलिङतर्फ मुम्बईका क्रुनाल पाण्डेले ३ विकेट लिदा जसप्रति बुमराह र मिचेल म्याक्लिघनले २-२ विकेट लिए।
आइपिएलमा मुम्बईको यो पहिलो जित हो। यसअघि मुम्बई लगातार ३ खेलमा पराजित भएको थियो। यता बैंग्लोर पनि ४ मध्ये ३ खेलमा पराजित भइसकेको छ। चार खेलमा ३ खेल हारेको दिल्ली डेयरडेभिल्स भने मुम्बईको जितसँगै अंक तालिकाको पुछारमा झरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
