भीमदत्तनगर- कोरोना सङ्क्रमण पुष्टि भएपछि सङ्क्रमित बिरामीलाई आइसोलेशन कक्षमा राखेर उपचार गरिनुपर्ने भए पनि सुदूरपश्चिम प्रदेशमा धेरै सङ्क्रमित अस्पताल सुविधाभन्दा बाहिर छन्। यहाँका नौवटै जिल्लाका अस्पताल तथा स्वास्थ्य संस्थाहरूमा ३३३ जना संक्रमित राख्न मिल्ने आइसोलेशन शैय्या भए पनि यहाँ शुक्रबार साँझसम्म सङ्क्रमितको सङ्ख्या ७ सय ७० जना पुगेको छ।
सुदूरपश्चिम प्रदेश स्वास्थ्य निर्देशनालयका अनुसार यहाँका आइसोलेसन वार्डमा हालसम्म ११४ जना सङ्क्रमित रहेका छन् भने ४० जना सङ्क्रमणको शंकास्पद बिरामी छन्। प्रदेश स्वास्थ्य निर्देशनालयका निर्देशक डा गुणराज अवस्थीले सरकारले गरेको परिपत्रअनुसार नै अहिले यहाँका सङ्क्रमितहरू होम क्वारेन्टाइनमा बसिरहेको बताए। ‘लक्षण नदेखिएका सङ्क्रमितहरूलाई होम क्वारेन्टाइनमा बसेर सावधानी अपनाउन माथिबाटै परिपत्र भएको छ,’ उनले भने, ‘सङ्क्रमितहरू अस्पतालबाहिर रहे पनि सबै स्थानीय तहका स्वास्थ्यकर्मीहरूसँगको सम्पर्कमा छन्।’
निर्देशक डा अवस्थीले कुनै व्यक्तिमा लक्षण देखिएमात्रै सङ्क्रमितहरूको आइसोलेशनमा राखेर उपचार गर्ने बताए। त्यसैगरी यहाँका सबैजसो स्थानीय तहहरूले आइसोलेशन कक्षको क्षमता बढाइरहेको उनको भनाइ छ। ‘यहाँ क्वारेन्टाइनहरूलाई नै आइसोलेशन बनाउने काम भइरहेको छ,’ डा अवस्थीले भने, ‘अहिले हरेक स्थानीय तहको जोड आइसोलेशन बनाउनेमै छ।’
सुदूरपश्चिम प्रदेशको कैलालीमा सबैभन्दा बढी दुई सय आठजना सङ्क्रमित रहेका छन्। त्यस्तै डडेल्धुरामा १३१, बैतडीमा १२०, कञ्चनपुरमा ९५, बाजुरामा ६९, अछाममा ५९, डोटीमा ५७, बझाङमा १९ र दार्चुलामा १२ जनामा सङ्क्रमित रहेका छन्। निर्देशनालयका अनुसार हालसम्म सङ्क्रमितमध्ये १२४ जना अस्पतालबाट निको भएर फर्किसकेका छन्। यहाँको सेती प्रादेशिक अस्पतालमा ७४, डडेल्धुरा अस्पतालमा ४०, जिल्ला अस्पताल बझाङमा ३५, भीमदत्तनगरस्थित महाकाली अस्पतालमा ३३, टीकापुर अस्पतालमा ३२ र मालाखेती अस्पतालमा २० शैय्याको आइसोलेशन रहेको छ।
त्यसैगरी जिल्ला अस्पताल अछाममा १७, बयलपाटा अस्पतालमा १३, बाजुरामा १२, डोटीमा १०, बैतडीमा आठ, जिल्ला अस्पताल दार्चुलामा १३, भजनी प्राथमिक स्वास्थ्य केन्द्रमा चार, चौमला प्राथमिक स्वास्थ्य केन्द्रमा पाँच, गोकुलेश्वर अस्पतालमा चार, कोल्टी प्राथमिक स्वास्थ्य केन्द्रमा दुई, जोगबुढा अस्पतालमा आठ र सुदूरपश्चिम प्रहरी अस्पतालमा तीन शैय्याको आइसोलेशन रहेको निर्देशनालयले जनाएको छ।
त्यसैगरी यहाँका ८८ वटै स्थानीय तहका २ हजार ६८ स्थानमा क्वारेन्टाइन सञ्चालनमा ल्याइएको छ। यी क्वारेन्टाइनमा शुक्रबारसम्म ३७ हजार २०५ जना बसिरहेका छन्। प्रदेशमा पछिल्लो समय भारतलगायत अन्यत्रबाट आउनेहरूको सङ्ख्यामा कमी आए पनि कोरोना परीक्षणको दायरा भने बढाउन सकिएको छैन।
शुक्रबारसम्म सुदूरपश्चिममा १० हजार २ सय ४५ जनाको पिसिआर विधि र ९६ हजार ७ सय ६० जनाको आरडिटी विधिबाट कोरोना परीक्षण गरिएको छ। पिसिआर विधिबाट परीक्षणका लागि लिइएको स्वाबमध्ये ४ हजार ७ सय ५९ जनाको रिपोर्ट आउन बाँकी रहेको छ।
धनगढीमा सञ्चालनमा ल्याइएको प्रयोगशालामा दैनिक २५० जनाभन्दा बढीको परीक्षण गर्न सकिरहेको छैनन्। यहाँबाट सङ्कलित नमूना परीक्षणका लागि राष्ट्रिय जनस्वास्थ्य प्रयोगशालामा समेत पठाउने गरिएको छ। प्रदेश सरकारले बैतडी र डोटीमा समेत पिसिआर मेशिन जडान गरी परीक्षणको दायरा बढाउने निर्णय गरेको दुई महिना बितिसके पनि अझै शुरु हुन सकेको छैन। प्रदेश स्वास्थ्य निर्देशनालयले भने पिसिआर मेशिन खरिद प्रक्रियामा गइसकेको र मेसिनहरू असार तेस्रो सातासम्म सुदूरपश्चिम आइपुग्ने जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
