फाइल तस्बिर
धनगढी- सुदूरपश्चिम प्रदेशसभा सदस्यहरूले प्रदेश सरकारको नीति तथा कार्यक्रममार्फत ल्याइएका कार्यक्रमहरु कार्यान्वयन हुनेमा आशंका व्यक्त गरेका छन्।
बिहीबार प्रदेशसभा बैठकमा नीति र कार्यक्रममाथिको छलफलमा भाग लिएका प्रदेश सभा सदस्यहरूले सरकारको नीति तथा कार्यक्रममा जतिसुकै 'लोकप्रिय' कार्यक्रम ल्याए पनि कार्यान्वयन पक्ष सधैं फितलो हुने गरेको टिप्पणी गरे। छलफलमा भाग लिदै प्रमुख प्रतिपक्षी दल नेपाली काँग्रेसका प्रदेशसभा सदस्य भरतबहादुर खडकाले नीति तथा कार्यक्रम र बजेटको कहिल्यै पनि तालमेल नमिलेको स्मरण गरे। 'नीति तथा कार्यक्रम जसरी आउँछ, त्यसअनुसारको बजेट आउँदैन। योजना भनेको कुरा व्यवस्थित हुनुपर्छ, नत्र समस्या आउँछ,' उनले भने।
प्रदेशसभा सदस्य खड्काले नीति तथा कार्यक्रममा धेरै कुरा समेट्न खोजेको चर्चा गरे। 'नीति तथा कार्यक्रम हेर्दा संघीय सरकारको पुरै बजेट समावेश गर्दा पनि पुग्दैन,' उनले भने 'नीति र कार्यक्रममा गरिवी न्यूनिकरण, प्राकृतिक स्रोत साधन, कृषि, स्वास्थ्यको पहुँच पुर्याउने मुल नीति नै उल्लेख भएन।'
प्रदेशसभा सदस्य खड्काले पश्चिम सेती परियोजनालाई अघि बढाउन प्रदेश सदनबाट संकल्प प्रस्ताव पारित गर्नुपर्ने बताए। उनले मुख्यमन्त्रीका नाममा कार्यक्रम ल्याउन नहुने सुझाव दिएका थिए।
नेपाली कांग्रेसका टेकबहादुर रैकाले सरकारको नीति र कार्यक्रम संघसंस्थाले डलर हालेर बनाएको कार्यक्रमजस्तै रहेको टिप्पणी गरे। संघसंस्थाको प्रतिवेदनजस्तै बनेको यो (नीति तथा कार्यक्रम) लाई सरकार आफैले लागू गर्न सक्छ कि सक्दैन भनी उनले प्रश्न उठाएका थिए।
‘चालू आर्थिक वर्षमा सुन्तला, ओखरका कति बोट रोपिए, मसुरो खेतीले कति आम्दानी भयो? भन्ने जानकारी सरकारले दिनुपर्छ,’ उनले विगतका कार्यक्रमको मूल्यांकन गरी सोही प्रतिवेदनका आधारमा नीति तथा कार्यक्रम आउनुपर्ने सुझाव दिँदै भनेका थिए।
नेपाली काँग्रेसकै प्रदेशसभा सदस्य डिल्लीराज पन्तले नीति तथा कार्यक्रम नाराले भरिएको टिप्पणी गरे। ‘खानालाई बढा मिठो हुने, सुन्नेलाई पनि बढो आनन्द मिल्ने’ जस्तो छ। तर, यसरी सस्तो प्रशंसा पाउनकै लागि जे पनि ल्याउनु हुदैन। जे गर्न सकिन्छ, त्यो मात्रै लेख्यौँ,' प्रदेश सभा सदस्य पन्तले भने, 'सरकारको प्रगतिको अलग्गै समिक्षा हुनुपर्छ। यसलाई नीति तथा कार्यक्रममा नल्याऔं। हामीले सोध्नुपर्ने र सरकारले जवाफ दिने गरि सरकारको कार्यक्रमको समिक्षा गरिनु पर्दछ।'
काँग्रेसकै प्रदेश सभा सदस्य दिव्यश्वरी शाहले विगतका बजेट, नीति तथा कार्यक्रम पनि राम्रै भएको, तर कार्यान्वयन पक्षमा भने निकै कमजोर भएको बताइन्। उनले गतविगतका राम्रा कार्यक्रमलाई अहिले आएर छोडिएकोमा आपत्ति जनाइन्। कांग्रेसकै अर्की सांसद् अम्बिकुमारी थापाले गतविगतका कार्यक्रम नै सरकारले कार्यान्वयन गर्न नसकेकोमा आगामी आर्थिक वर्षका लागि सरकारले ल्याएको नीति तथा कार्यक्रम कार्यान्वयन हुनेमा भर गर्न नसकिने बताइन्।
छलफलमा भाग लिँदै सत्तारुढ नेपाल कम्यूनिष्ट पार्टी (नेकपा) का प्रदेश सभा सदस्य विरमान चौधरीले नीति तथा कार्यक्रमको प्रभावकारी कार्यान्वयन गर्न आवश्यक संरचना निर्माण गर्नुपर्ने बताएका थिए। सत्तारुढ दलकै अर्का प्रदेश सभा सदस्य पूर्णा जोशीले नीति तथा कार्यक्रम विगतका वर्षभन्दा परिपक्व, परिस्कृत भएर आएको बताइन। उनले व्यक्ति र संस्थासंग जोडेर कार्यक्रम आउदा आलोचित हुनुपर्ने बताइन्।
उनले नौ वटै जिल्लामा रहेका स्वास्थ्य संस्थालाई थप बलियो बनाउने गरी बजेट ल्याउनुपर्ने बताएकी थिइन्।
छलफलमा नेकपाका प्रदेश सभा सदस्यहश्र नेपालु चौधरी, अम्मरबहादुर साउँद, मानबहादुर सुनार, ग्याल्बुसिंह बोहरा, सुशीला बुढाथोकी, माया तामाङ बोहरा, चुनकुमारी चौधरी र प्रेमप्रकाश भट्टले पनि भाग लिएका थिए।
'होम क्वारेन्टाइनमा जोड दिऔं'
बैठकमा सुदूरपश्चिम प्रदेश सभा सदस्यहरूले अब ‘होम क्वारेन्टाइन’मा जोड दिनुपर्ने बताएका छन्। सुदूरपश्चिम प्रदेश सभाको बिहीबारको बैठकमा भाग लिएका अधिकांस प्रदेश सभा सदस्यहरुले होम क्वारेन्टाइनमा जोड दिनपर्ने बताए। नेकपाका प्रदेश सभा सदस्य पूर्णा जोशीले भनिन– सुदूरपश्चिम प्रदेशका विभिन्न जिल्लाका क्वारेन्टाइनमा हालसम्म ११ जनाको मृत्यु भइसकेको छ। त्यसैले अब होम क्वारेन्टाइनतिर ध्यान दिनुपर्छ।
नेकपाका प्रदेश सभा सदस्य महेशदत्त जोशीले सुदूरपश्चिम प्रदेशको अवस्थाले नभई वेरोजगारीका कारण कोरोना भाइरसको संक्रमण बढेको दाबी गरेका थिए। 'यहाँ रोजगार नहुँदा यस प्रदेशका धेरै मानिस भारत गए। अहिले फर्किएकाहरुका कारण यहा कोरोना संक्रमण बढ्यो। विद्यालय वा अन्य ठाउमा क्वारेन्टाइनमा राख्ने प्रबन्धको साटो अब होम क्वारेन्टाइनमा जोड दिनु आवश्यक छ।'
प्रमुख प्रतिपक्षी दल नेपाली कांग्रेसका प्रदेश सभा सदस्य भरतबहादुर खडकाले स्वाब परीक्षणको दायरा बढाउन माग गरे। कांग्रेसकै डिल्लीराज पन्तले कोरोनाका कारण सरकारले मात्र नभएर प्रदेशसभा सदस्यहरुले समेत जनताको गाली खाइरहेको गुनासो गरेका थिए। 'हामीकहाँ भारतबाट कति जना आए भन्ने स्पष्ट तथ्यांक छैन। कोरोनाका लागि स्पष्ट जवाफ चाहियो। कहाँ कहाँ के अपुग भएको छ ? किन सरकार आलोचित भइरहेको छ,’ उनको भनाइ थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
