काठमाडौं- परराष्ट्रमन्त्री प्रदीप कुमार ज्ञवालीले कोरोना भाइरस (कोभिड–१९) का कारण विदेशमा समस्यामा परेका नेपालीको समस्या समाधान गर्न सरकार प्रयासरत रहेको बताएका छन्।
यसका लागि सरकारले कुटनीतिक पहलका साथै अन्य आवश्यक तयारीहरु गरिरहेको उनको भनाइ छ।
नेकपा काठमाडौं क्षेत्र नम्बर १ का इन्चार्ज अनिल शर्मा नेतृत्वको टोलीले बुधबार परराष्ट्र मन्त्रालयमा यसबारे ध्यानाकर्षण गराएपछि मन्त्री ज्ञवालीले यस्तो जानकारी दिएका हुन्।
भेटका क्रममा शर्माले काठमाडौंसहित देशैभरबाट हाल अध्ययन तथा रोजगारीको सिलसिलामा विदेशमा पुगेका कतिपय नागरिकमा समस्या परेकाले परराष्ट्रमन्त्रीको ध्यानाकर्षण गराएका थिए।
सो क्रममा मन्त्री ज्ञवालीले विदेशमा अध्ययन एवम् रोजगारीमा रहेका नेपालीहरू कोरोना महामारीका कारण समस्यामा परेकोबारे सरकार जानकार रहेको र उनीहरूको समस्या समाधानमा लागिरहेको जनाए।
अध्ययन एवम् रोजगारीको सिलसिलमा जापान, अस्ट्रलेलिया, क्यानडा, अमेरिकासहित युरोपेली मुलुकमा पुगेकाहरूलाई प्राथमिकताका आधारमा उद्दार गर्ने तथा बाँकीलाई एक वर्षसम्मको भाडा छुट गरिदिनका लागि कुटनीतिक तवरबाट सम्बन्धित देशसँग कुराकानी भइरहेको जानकारी दिए।
यस्तै विद्यार्थीका लागि फीलगायतका समस्या भएको गुनासो आएकाले सो समस्या समाधानका लागि विभिन्न उपाय खोजिएको उनले बताए।
जसमध्ये नेपालबाट खर्च पठाउन सहज गर्ने, विदेशमै पनि तत्काल फी तिर्न नपर्ने व्यवस्था गरिदिन पहल गर्नेजस्ता कार्य भइरहेको उनको भनाइ छ।
दक्षिण कोरियामा कार्यरतहरू कतिपयको भिसाको म्याद सकिएको अवस्थामा उनीहरूलाई स्वदेश ल्याउनका लागि प्राथमिकतामा राखिएको पनि मन्त्री ज्ञवालीले बताए।
यस्तै खाँडीमा पुगेका युवाहरूका लागि रोजगारी, राहत, उपचार र फिर्ता ल्याउने विषयमा छलफल भइरहेको भन्दै उनले समस्यामा नै परेकालाई सरकारले स्वदेश नै फर्काउने बताए। यसका लागि क्याबिनेटले निर्णय समेत गरिसकेको र निर्णयअनुसार कार्यविधि बनाएर उनीहरूको हितअनुरुप सरकारले कार्य गर्ने उनले प्रष्ट पारे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
